German football club Union Berlin chuan an manager Urs Fischer nena an thawhdunna chu titawp turin inremna an nei tih an puang.
Union hi Bundesliga-ah an season nga na an hmang mek a, kum 57 mi Swiss manager hnuaiah hian a season hmasa berah German football a league sang berah a kaisanpui nghal.
Berlin khaw club hi German football a club thenkhat angin fans ten neitu nihna an chelhna club a ni a, tunhnai season thum chhung Europe huap inelnaah an inlan thei a. Tun season bikah UEFA Champions League an khel.
Nimahsela tun season-ah an che tha lova, Bundesliga bikah game 11 khel tawhin table mawngphahah an la awm.
Union president Dirk Zingler chuan, “Keima mimal tan chauh pawh ni lovin Union chhungkua tan chuan ni duhawm lo tak a ni.”
“Tunhnaia kan hun harsa tawh kan kalsan hleithei lo hi a na a, amaherawhchu kan hun kal tawha kan hnathawh leh kan hlawhtlinnate thlir hian lawmna nasa tak ka nei.”
“Kan tawpna hi na mahse Urs Fischer hian thian a nihna awm reng chungin min chhuahsan a, kan kiangah a tan hmun a awm reng.” tiin an thutlukna siam chungchang a sawi.
Fischer hnuaiah hian Union in Bundesliga-ah 11-na, pasarihna, pangana leh palina an ni a. Tunhnai kum thum chhungin Europa Conference League, Europa League leh Champions League te an khle vek.