Kumin zet chu zofate kan va tal buai em. May thla atangin Manipur lam unauten buaina namen lo an tawk a. Mi tam tak an thi a. Vawiin ni thlengin an buaina chu a la kal mup mup a. Meitei hovin ral raih khawpa nawr an tum a. An chenna ram ata umchhuah a, an ram chu neihsak vek an tum mek. An mangang in an belh tur chu keini mizoram chauh hi a ni. Belh tur dang an nei lo.
2021 atanga buai Myanmar lam unaute chu sipai sawrkarin a sawisak retheih avangin manganna tawpkhawk an tawng a. An ram rorelna insingsa an tuar a. Nimin lawk thlengin khawchhak ramri ah te silai nen an la in thumrawn ut ut a. Tlanchhiatna an neih chhun chu zofate jerusalem, mizoram chauh a ni. Mikhual sing tel kan nei lo thei lo. Kan unaute manganna chu kan manganna, an tawthna chu kan tawrhna ani miau si.
Thlang lamah Bangladesh unaute chu an chenna ram insingsa avang bawkin an chenna atanga nawrchhuah mek an ni a. Anni hi kan pi leh puten thlang an tlak laia ram lo zuk valh thui deuh, mizoram siam zautute an ni. An tawrhna hi mahniah inchan ila a va na dawn em. An pi leh pu atanga an lo luah ram ata umchhuah mek niin an belh theih awmchhun chu keimahni bawk. Cachar lamah vaiho in kan ram sahhek tumin namen lo in an bei a. Kan han nek ve dawm thin a. Silai nena nek mai loh chuan a kawng a ping tawh a. Mahse, silai nena innek hi ramkhat theuhah chuan a rem silo. A kawng awmchhun nia lang chu a rama cheng tur mihring kan mamawh ni te pawhin a lang zawk mah a ni.
Heti hi tuna kan zohnahthlak te dinhmun anih laia zofate jerusalem kan tih mai mizoram dinhmun chu a ni a. A chhunga zofate hian mawhphurhna kan va nei lian em. Kan unaute huikhawm, an thlavang hauh ngam hi kan bat leh kan tih ngei ngei tur a ni a. An thlavang hauh tur hian engnge kan nih. Rilru thar pu a kan insan mai a va ngai em. Mahni unaute belh tlak hauh loh, mikhual tlemte an lo luha budget buai nghal ni reng ringawt tur hian em ni kan awm reng dawn? Nge kan inngaihtuah harh ang a, zofate zawng zawng tana belhfakawm ram din kan tum ang? Mitinin kan thinlungah he ram mawhphurhna hi ka kut a ni tih rilru puin mahni seh seh mualah theuh tan la ila. Kuthnathawktu atanga sumdawng lian, sawrkar hnathawk tê ber atanga a lian ber thlengin ram siam tumna rilru i pu thar leh ang u. Israel faten belh tlak ram an siam theih laia keiniin kan siam theih lohna tur bik a awm lovang. Chu chu ram leh hnam hmangaihna dik tak a ni.