Silai kengten Ethiopia khawthlang lama passenger phur bus an beihnaah mi 34 zet an thah niin an rama mihring dikna chanvo humhalhtu pawh chuan nimin khan an sawi.
Ethiopian Human Rights Commission (EHRC)-in thuchhuah an siamah chuan ‘thi hi mi 34 nia hriat a ni a, a aia tam pawh a nih a rinawm’ an ti a. Bus beihna hi Inrinni zana Benishangul-Gumuz ram bial huam chhung, Debate-ah a nih thu an sawi.
EHRC chuan civil mite rawng taka beihna dang a thlen leh thu leh tun hnaia tharum thawhna a thlen nasat em avangin mi tam tak an tlanchhe tawh a, himna an zawng nasa tih a sawi.
A titute hi hriat mai theih a la ni lo va. He beihna hi Ethiopian sorkar leh an ram hmar lama Tigray ram bial sorkar sipaite an indo lai, mi za tel an thih tawhna leh mi 20,000 chuangin himna zawnga an thenawm, Sudan-a an tlanchhiat mek laia thleng a ni.
Benishangul-Gumuz-a bus beihna thleng leh sorkar sipaiten Tigray an beihna hi a inzawm leh zawm loh erawh hriat a la ni lo.
Passenger phur bus hi Wonbera atanga Chagni pan a ni a, heng lai hmun hi tun hnaia civil mite nasa taka beihna a thlenna thin hmun a ni.
EHRC hotupa, Daniel Bekele chuan ram bial leh sorkar laipuia thuneitute chu Benishangul-Gumuz-a inbeihna, a bikin civil miten nasa taka an tawrhna thleng thin titawp tura an thawhho a ngaih thu a sawi.
“Beihna thleng leh hi mihring tam tak inchânna, tanghova thawh chhuah ngaihna chi a ni,” a ti.
Prime Minister Abiy Ahmed-a sorkar hian tun hnaia Benishangul-Gumuz-a tharum thawhna thleng thinah hian hma a la tlem hle a, a bikin Debate awmna, Metekel zone-ah tha a thawh tlem zual.