Aizawl: Global Mizo Council (GMC) chuan nimin khan Apex Bank Main Office Tuikual-ah thuthar thehdarhtute an kawm a, an pawl hmalak tum dante an puang.
GMC Chairman Vanlalngaia chuan GMC din a nih dan sawifiahin, “Hming khat, Mizo-a inpumkhat tur leh ram leh hnam kalsiam tur rel khawmna hmun inpui ni turin GMC hi din a ni,” a ti a, kumin June 7-a ding tan an nih thu te, ram hrang hranga awm Mizote an luanza theihna turin theihtawp chhuaha hmalak zel an tum thu te a sawi.
GMC hruaitu dangte pawhin thu sawiin Mizo hnam peng hrang hrangte chu a mala din chhuah a harsat thu te, chumi avang chuan hruai khat vuana inpumkhat a tul a, he hnam hi hnam dangte zah rawn a nih a, hnam ropui tak a nih chhunzawm zel theih nan inlungrual tlan a tul a, chu chu an aupui ber a nih thute an sawi.
Tun hnaia Myanmar, Bangladesh leh Manipura Mizo awmten harsatna an tawh chungchangte pawh sawi telin, he an harsatna tawh hi Mizote pumkhata siamtu a nih chhunzawm an besei thu an sawi a, hmun hrang hranga cheng Mizote harsatna tawh chungchanga Mizorama cheng mipuite tuam hlawm dan chu lawmawm an tih thu an sawi bawk.