Mizoram Pradesh Congress Committee (MPCC) President Lalsawta chuan MLA inthlanpui neiha an party mi senior tak takin mi dang an kian thei chu lawmawm a tih thu a sawi.
MPCC hian nimin khan Congress Bhavan-ah kumin MLA inthlanpui neih chungchangah lawmthu sawi inkhawm an nei a. Inkhawm hi Congress MLA Lalrindika Ralte in a kaihruai.
Lawmthu sawi inkhawmah MPCC President Lalsawta chuan thu sawiin, MLA inthlan neih zawh taka an senior tam tak, candidate atan la tha tak trak te’n candidate chuh lo va, midang te an kian chu lawmawm a tih thu a sawiin, “Mi thar zaa 33 lai candidate kan nei thei a, an chungah lawmthu ka sawi a ni,” a ti.
Chief Minister hlui, MPCC President hlui ni bawk Lal Thanhawla chungah lawmthu sawiin Lalsawta chuan, “Serchhip-ah te a han campaign a, a thawhhlawkin kan lawm takzet a ni,” tiin, party chhung leh pawn atanga thahnem ngai taka campaign puitu leh thawktu zawng zawngte chungah te, candidate te tana an tlin loh hlau a thawktute leh candidate te chungah pawh an lawm thu a sawi.
MPCC Sr Vice President Lal Thanzara pawhin, “Kan campaign chhung zawnga candidate te leh campaigner te min vengtu Pathian hnenah lawmthu kan sawi a. Campaign Committee te, Finance Committee te chungah lawmthu kan sawi a. Dr. Vansanglura, Principal, Serampore College leh Pu LC Tluanga, Tlangnuam veng te chungah lawmthu kan sawi,” tiin, thahnemngai taka thawktu zawng zawng te chungah an lawm thu a sawi.
Inkhawmah hian MPCC Vice President Lalnunmawia Chuaungo leh MPCC Treasurer Dr. Lalmalsawma Nghaka te pawhin lawm thu an sawi bawk.