Australia in ICC Men’s Cricket World Cup final an khel dawn a, South Africa nen chak tur zawk rin harsa khawpa team pahnih inkara danglamna tlem inkhelah wicket thum in an chak.
Kolkata a Eden Gardens a inkhelah hian South Africa in vuak an thlang a, Australia bowler ten run 212 chiah siamtirin an vawm out zo.
Australia in Travis Head-a run 62 siam chhawr tangkaiin bul an tan tha viau. Amaherawchu Proteas spinner ten an chhaihbuai zui a, wicket nga an hlohin run 137 chiah an siam.
Chak tura run 20 an mamawh laiin Australia in wicket sarih an hloh hman a. South Africa bowler-ten chak hram tumin nawr na hle mahse a tawpah erawh ball 16 hmang bangin captain Pat Cummins leh Mitchell Starc ten an chakpui thei.
- Proteas an tling teuh
South Africa lakah Australia bowler Josh Hazlewood leh Starc ten ball thar hmangin an ram an chetthatpui a. Run 24 an siamtir laiin wicket li an la tawh.
Mahse Proteas tan David Miller chuan ball 116 atang run 101 a siam a, run za hnih an kai theih chhan a ni.
An run bituk zat hum turin theihtawp an chhuah a, an vawm leh fielding-ah fakawm mahse final lut tur erawhin a tha tawk lo.
- Inkhel zawh lam
Australia captain Pat Cummins chuan, “Kan inkhel kaldan avangin inkhel pawh a rei duh hle. Kan team kan kheltha rual a, hnehna chang tura kan inpekna a sang hle.”
“Kum 2015 final kha ka huntawn ropui zing ami a ni a, chuvangin tun tum pawh hi final boruak ropui tak a ni leh ang.” tiin a sawi.
South Africa captain Temba Bavuma chuan, “Kan huaisenna leh tlo na a lang a, inkhel hautakah pawh kan tling teuh. Kan bul tan dan khan kawng hnihin inkhel a nghawng a, mahse a harsa hret ta a ni.” tiin a sawi ve bawk.
- Ningani inkhel result
South Africa vs Australia
South Africa 212( 49.4 Overs)
David Miller 101 (116)
Heinrich Klaasen 47 (48)
Mitchell Starc 3/34 (10)
Pat Cummins 3/51 (9.4)
Australia 215/7 (47.2 Overs)
Steven Smith 30 (62)
Travis Head 62 (48)
Tabraiz Shamsi 2/42 (10)
Gerald Coetzee 2/47 (9)