Tunkar chhunga neih tur World Amateur Mixed Martial Arts Championship-ah India mixed martial arts thuneitu MMA India in a aiawhin fighter panga a tir a, heng zingah hian Mizo fighter Zarmawia a tel.
Vawiin atangin Tiran, Albania ah International MMA Federation buatsaih inelna hi neih tan a ni dawn a. India aiawh a kalte zingah Chite tlangval Zarmawia hi telin featherweight huangah a inelna ang.
He inelna a tel tur hian kumin chhunga national inelna hrang hranga che thate chu ram hrang hranga national federation ten an thlang a. Heng zingah hian Zarmawia hi a tel.
India mixed martial arts huangah record nei tha hle in weight hrang pathum a national champion a ni a, hei hi India rama record a ni.
Zara hi LPS leh MISMA ṭangkawpin an huaihawt Mizoram Fight League champion lai a ni bawk.
SPES Martial Arts gym. Aizawlah inbuatsaihna nei thinin tun World Championship pual bik hian inpuahchah nan Bali MMA Gym-ah hun engemaw chen training a nei a ni..
MISMA president T. Lalrinpuia chuan Zara lakah beiseina sang tak an neih thu a sawi a. “MISMA in a tum ber chu professional fighter mahni thiamna hmanga ei zawng thei tur a tam thei ang ber chherchhuah a nih angin Zara hian medal a lak chuan nakkum lamah professional line-a a luh chhoh theihna kawng a inhawng dawn a ni.” a ti.
IMMAF hi BRAVE leh UFC nen inthlun zawm a nih angin fighter thate tana kawng inhawn thui theihna a ni a. IMMAF international medalist 20 chuangin UFC-ah contract an sign tawh thu a sawi bawk.
He championship-ah hian official ni turin India ram atangin mi pali an tel a, MISMA technical chairman Samuel Lalrozama, Dawrpui chu a kal ve a ni.
Official turte hi MMA lama khawvel huapa thuneitute thlan an ni ve thung a. International Technical Official te hi thlan bik niin thuneitu lamin full sponsor a an kaltir an ni thin.
MISA chuan a theih chinah ram pawna inel tura zinchhuakte chu sum leh paiin a tanpui thin a, tun tumah pawh MMA Senior Vice President Jeremy L. Pautu chuan MISMA aiawhin pocket money tur Zara hnenah cheng singkhat leh Samuela hnenah cheng sangnga a pai.