Aizawl: Zirtawpni chawhnu dar 1:30 khan Aizawl Theological College (ATC) chuan College Day vawi 58-na an hmang a, Upa Prof. Lalnundanga, Registrar, Mizoram University chu speaker a ni.
Synod Moderator Rev. Dr. C. Chawnghmingliana kaihhruai College Day hmanah hian Rev. Prof. Tlanghmingthanga, ATC Principal-in inlawmna thu a sawi. Rev. C. Zorammawia, Senior Executive Secretary, Mizoram Synod leh Upa B. Lalhmunliana, Synod Secretary (Sr) ten zirlai ti tha bikte hnenah lawmman hrang hrang an hlan bawk.
Speaker Upa Prof Lalnundanga chuan ‘Education from Christian Perspective’ tih thupui hmangin thu a sawi a. Tunlai khawvel inthlak danglam leh, a bikin New Education Policy avanga Kristiante tana chona nasa tak inchhawp leh mawhphurna te a sawi.
ATC hi kum 1907-ah Zosap Rev. D.E. Jones (Zosaphluia) hova din a ni a, tunah hian Pathian thu zirna regular course pathum te BD, MTh, leh DTh ah zirlai 204 an awm mek a, heng bakah hian Senate of Serampore College hnuaia pawn lam atanga zirna Lay Theological Degree hrang hrang BCS, DCS leh DCPC hawn a ni bawk.