Tunhnaia Myanmar sipai sorkar paih tum, ‘mipui tangrual sipai’ tia vuahten an camp an lak avanga Mizoram police hnena inpete chu nimin khan Mizoram atangin thiar chhuah an ni.
November 15, 2023 zing khawvar hma khan mipui tangrual sipaiten Tuibual khuaa Myanmar sipai camp luh chhuahin an la a, he camp-a awm sipaite chu tlanchhiain, November 16 chawhnu her khan Mizoram chhung, Saikhumphai thlengin, Mizoram police kutah inpein, Assam Rifles hnenah hlan nghal an ni.
Myanmar sipai 29-te hi an ramah thawn kir vat tum ni mah se khaw chhiat avangin hmalak a tihkhaihlak a, nimin chawhma dar 11 vel khan helicopter hmangin Mizoram atangin hruai chhuah an ni a, Manipur-a Moreh khuaah dah an ni ang a, heta tangin Myanmar ram ril zawk panpui an ni ang.
Chin National Defence Force-ten Tuibuala Myanmar sipai hmun an luhchhuah avang hian mi 600 vel chu Saikhumphaiah an tlan lut a, ni hnih vel an raltan hnuah an khaw lamah an kir leh vek tawh niin thudawn a ni.
Mipui tangrual sipaiten Khawmawi leh Rihkhawdara Myanmar sipai camp an beih avang hian November 12 zing lam atang khan Champhai district chhung Zokhawtharah mi eng emaw zat an raltlan bawk a, boruak a ziaawm chhoh deuh tawh avangin heng mite hi an khaw lamah an kir leh deuh vek tawh niin Zokhawthar khawtlang hruaituten an sawi danin, zan lama boruak tha lo a awm palh hlau eng emaw zat erawh chu Zokhawthar lamah an la riak chhunzawm a, chhun lamah Myanmar lamah an lut phei leh thin a ni.