Aizawl: Students’ Experience in Inter – State Living (SEIL) buatsaihin Inrinni khan YMA Hall, Chanmari, Aizawlah hnam hrang hrang zirlaite inpumkhatna atan Cultural exchange programme hman a ni.
He hunah H Lianzama chu khuallian a ni a. Capt. Lalthanpuia, Divisonal Youth Secretary Central North Division, The Salvation Army, Indian Eastern Territory-in programme tanna hun a hmang a. Dr Ngurthankimi Sailo, Assistant Professor, IASE, Rtd-in thu sawiin, Nagaland governor hlui, P.B Acharya chungah a tawrhpui thu leh a thiltih ropui tak takte a tar lang bawk.
Advocate Thangremsanga, Co-Orinator, SEIL chuan Mizorama hna an thawh dan an tawnhriatte a sawi a. ABVP national Secretary Briraj Bishwas pawhin SEIL chungchang leh zirlaite inpumkhatna neih theihna tur chungchang zirtirna a pek bakah, an pawlin scheme hrang hrang an kalpui dan leh a than chhoh dan te a sawifiah.
He hunah hian zirlai kalkhawm hrang hrangten mahni hnam ziarangte entirin, Indian Institute of Mass Communication, Arunchal Pradesh Students Union of Mizoram, Zunleng Cultural Club, Hrangbana College ten zai leh hnam lâmte an entir a ni.
SEIL Co-ordinator Dr Robert V Lalengtluanga’n inkhawm hi kharin, ram pum huap inpumkhatna thlen theihna tura hnam hrang hrang atanga zirlai inpumkhatna chungchang a sawi a ni.