Vote chhiar ni sawn tura ECI dawr tuin NGO-ten lamkal tirh tum || Hlawhtlin loh chuan Protest Day

NGO Co-ordination Committee chuan Mizoram State Assembly inthlanpui neiha vote chhiar hun sawn turin Election Commission of India (ECI) hotute dawr tura lamkal intirh an rel a. Hei hian awmzia a nei lo a nih chuan Protest Day hman nise an ti.

Central YMA, MHIP, MUP, MZP leh MSU te telna NGO Coordination Committee chu Inrinni khan Tuikhuahtlanga Central YMA Committiee Room-ah an thukhawm a. Mizoram Legislative Assembly inthlan vote chhiar hun atan ECI-in December 3, 2023 (Pathianni) a ruat tawh chu a tihdanglam loh tur chungchang an sawi ho a. Inthlan vote chhiar hun sawn a nih theih nan ECI hotute chu an hmunpui ngeiah sawipui an rel a ni.

NGO Coordination Committee chuan ECI hotute chu inthlan vote chhiar hun sawn tura hmunpuia an sawipuiin awmzia a nei lo a nih chuan lungawi lohna lantir nan Protest Day hman an rel bawk.

Vote chhiar hun sawn a nih theihna turin Mizoram Kohhran Hruaitute Committee (MKHC) pawh an hma zawnah theihtawp lo chhuah zel turin an ngen bawk.

Tar lan tawh thin angin, ECI-in Mizoram Assembly inthlanpui vote chhiar hun atana a ruat December 3 chu Kristiannte ni pawimawh, Pathian an biakna ni a nih avangin Pathianni leh Inrinni ni lo hun dang ruat zawk turin MKHC, MPF, NGO Coordination Committee leh political party hrang hrangin an lo ngen tawh a. A bikin MKHC hian ECI hnenah vote chhiar hun sawn turin tum thum lai an ngen tawh nghe nghe.

Chawlhkar kalta Thawhlehni khan Mizoram Chief Electoral Officer Madhup Vyas chuan ECI hotute chu Delhi-ah kawmin, Pathiannia vote tlate chhiar hun sawn tur chungchang a sawipui a. A tuk, Nilaini khan Madhup Vyas chu Mizoramah let lehin, ECI-in inthlana vote tla chhiar hun a lo ruat tawh anga kalpui a nih tur thu a sawi a ni.

Leave a Reply

error: Content is protected !!