Pakistan chuan tun hnaia India-in Russia atanga S-400 missile defence system lei tuma thutlukna a siam chuan ram pahnih inkara ralthuama intlansiakna a tithar leh niin a sawi.
Nimina Foreign Office-in thuchhuah an siamah India-in ralthuam lei a tum avang hian anni tan pawh Ballistic Missile Defence (BMD) System chu lei ve lo thei lova a siam thu a tar lang a. “S-400 lei tumna hian South Asia-a inrintawnna awm a tichhia a, ralthuama intlansiakna a tinung thar leh a ni,” a ti.
India leh Russia hian $ tld 5 man zet, S-400 air defence system inleisakna tur hian tun thla tira President Vladimir Putin-an New Delhi a tlawh tuma Prime Minister Narendra Modi nen an inkawm khan an tifel a ni.
Pakistan Foreign Office chuan May, 1998-a ram pahnihin nuclear an enchhin hnu khan Pakistan-in intlansiakna a tawp theih nan Strategic Restraint Regime chu nei dun turin India a sawm a, hei hi India-in duh lo niin a tar lang.
“India-in he ruahmanna a hnawl avang hian BMD system neih tumna hi a awm zel a ni,” a ti a. Pakistan chu ram dang lak atanga beihnaa him tuin theihtawp a chhuah zel dawn tih a sawiin an hmelmaten an tih chuan chhanglet zel dawn tih a sawi bawk.