Election comission in Mizoram inthlanna vote chhiar ni atana 3 December, 2023 a rawn ruat chuan titi a ti tam hle mai. Ngaihdan kan sawi luih luih a. Kan chawlhni thianghlim ber khera vote chhiar chu duh lohna thawm a ring viau a. Chutih rual chuan ngaihdan tam takah vote chhiar chu a pawi em emna a awm chuang emaw nile ti pawl an tam hle bawk. Ngaihdan insual karah kan NGOCC chuan theih tawpa Delhi lama election commission a dilna la siam leh an tum thu an chhuah a. An hlawhtlin loh chuan engemaw zawng tala protest siam te pawh an la sawi bawk. Engtinnge boruak a kal zel ang tih erawhchu hunin a la rawn hril turah ngai ila.
Kan chawlhni serh hi central lam hian zawi zawiin min pal zam hret hret a. A bik takin tuna central a sawrkarna chelh mek bjp sawrkar hian mumal takin min palzam luih sak zel a. A thunei lo zawk kan nih hi an hre khawp mai. Helaia kan lo dawnsawn dan pawh hi kan in enlet a hun tawh viau. Central minister thenkhat chawlhni hmanga programme rawn siam lui tlat te an awm ta fo mai a. Sakhuana inzah loh sakna zawnga kan lak chuan a na khawp mai.
Amaherawhchu keini lam pawh hian kan sunday hi chawlh satliah anga kan hman nasat tak avang hian central lam pawh hian min nuthuri zuam tawh emaw ni aw a tih ve theih tho bawk. Central minister in sundayah programme an rawn siam lo sawisel hi an awm ngai lova. An awm anih pawhin sawrkar hnathawk, holiday a kal hreh avanga phun an ni deuh ber a. Chung mite lah chuan sunday a an hnathawh ai monday a chawlh an hman tak daih pawh hriat tur a awm nual a. Kan chawlhni serh hi serh lovin kan chawl mai mai a. Hei hi khulam khuan an hai hauh lova. Min palzam ta viau ni te pawhin a lang. Kan krismas ni 25th December chu good governance day tiin bjp sawrkar chuan a puang hmiah mai a. Kristiante ni pawimawh ber mai kan Lalpa Isua lo pian ni pawh chutianga an rawn puan pawh chuan na taka do letna thawm kan neih kan hre lem lova. Kan kalphung pangngaiin kan kal mai a. Vaiho chuan lo ti ve mai mai rawh se kan ti a. Mahse, hetianga ni pawimawh in namnul sak hi ngaihpawimawh a ngaihzia kan man lo emaw ni le a tih theih.
Sakhua kan ngaipawimawh tak tak a, kan ni serhte pawh midangin min ngaih pawimawh sak kan duh anih chuan keimahni hian kan ngai pawimawh hmasa tur a ni. Tun tuma hetianga an rawn ti ngam hi a bul tak chu keimahni kan ni tih hi ngaihtuah chian a tha hle. Chawlhni a hnathawh leh thil dang tam tak kan chawlhsan rual chiah hian kan ni serh ani tih lanna turin kan nunphungah tih lan a ngai a. Chawlhni anih vanga inchei satliah ringawt lova, kan biak Pathian duhzawngin kan nung em tih pawh inngaihtuah chian a tha khawp mai.