Aizawl: Mizoram inthlanpui vote chhiar ni atan Pathianni ruat a ni chu an ngaih thu tak thu, Mizoram Pradesh Congress Committee (MPCC) chuan nimin khan an thuchhuahah an tar lang.
An thuchhuahah MPCC chuan, “Kohhran leh NGO te ngenna a ngaih pawimawh lote hi Mizote sentiment ngaih pawimawh lohna lian takah a ngai a, Election Commmision of India (ECI) hian Mizote rilru tihnat a pawi ti lo mai ni loin a tum lui tlat niin kan ngai a ni,” an ti.
MPCC thuchhuahin a tar lan danin, MPCC President Lalsawta’n October 9, 2023 khan a vawi khat nan Chief Election Commissioner Rajiv Kumar hnenah lehkha thawnin, ‘In hriat angin, Pathianni hi Mizoram mipuite tan chuan ni thianghlim a ni a, Pathian tana inserh ni, Pathian biak ni atan a hman a ni. Chuvangin Mizoramah he ni hian programe dang liantham hman a ni ngai lo. He ni hian Congress party chauh ni lo, Mizo Kristianten vote chhiar loh nise kan duh a ni.
‘Mizo mipuite sentiment min zahsak a, he ni hi Thawhtanni atanga Zirtawpni inkarah min sawnsak turin ka ngen a che,’ tiin lehkha a lo thawn tawh a ni.
ECI lamin thuthar engmah an neih loh tak zel avangin MPCC President Lalsawta chuan November 13, 2023, Thawhtanni vek khan Chief Electoral Officer chu lehkha thawn lehin, ‘A hmaa ka lehkha ang khan, Mizoram inthlanpui vote chhiar ni chungchangah i ngaihhnathiamna ka rawn dil che a, December 3, Pathianni hi Mizo mipuiten Pathianni atan kan serh ni, Pathian kan biak ni a nih avangin vote chhiar ni ruat a ni hi min sawnsak turin ka ngen a che.
‘Vote chhiar ni ruat a nih danah hian state danga election a nghawng theih avangin kan hrethiam a. Election schedule in siam angin vote thlak hnuhnung ber tur, Telengana state chuan November 30-ah an thlak dawn a, vote chhiar ni chu state pali inthlanah hian Dercember 3, Pathianni ruat a ni a. I hnena ka ngen tawh angin, Mizoram hi state lian lo tak kan nih avangin inthlan tihfel ni atan in ruat, December 5 hma hian Mizoram vote chhiar ni hi December 4 emaw, ni 5-ah pawh sawn nise kan intihfel vek hmanin a rinawm a ni.
‘Mizoram vote chhiar ni sawn hian engmah nghawng pawi a neih dawn loh avangin min sawnsak hram turin ka han ngen nawn leh a che,’ tiin lehkha a thawn leh a ni.
MPCC chuan vote chhiar ni sawn chungchanga Mizo mipuite ngenna, Joint NGO leh MKHC te hialin ngenna an siam Election Commission-in a ngai pawimawh duh lo tia tar langin, “Rajasthan vote thlak ni Hindu-te hun pawimawh anih avanga a sawn bik hi a ngai thu tak hle a. Vote chhiar ni dodal tumna hial awm ta hi pawi a ti em em a ni. Election Commission hian Mizoram vote chhiar ni hi sawn ngei se tih hi Congress party duh dan leh dinna a ni tih Mizoram mipuite hnenah kan puang a ni,” an ti bawk.