Central YMA President Lalhmachhuana’n ram leh hnam humhalh turin thapui thawh a tul tak zet tih a sawi.
Tun hnaia Central YMA hruaitu atana thlan tharte leh Mizoram Journalists’ Association (MJA) member-te chu nimin khan Tuikhuahtlanga Central YMA Committee Room-ah an inkawm a. He hunah hian mi hrang hrangin an ngaihdan leh rawtnate an sawi hlawm.
Central YMA President Lalhmachhuana chuan Mizoram rûn mektu, ruihhlo do kawngah tan nasa taka lak a tul tih sawiin, “Min dotu ruihhlo do kawngah tan lak nasat a ngai a. Lalpan hnam leh ram min pe a, heng zawng zawng humhalh tur hian thapui kan thawh a ngai a ni,” a ti.
Tun hnaiah ruihhlo, a bikin ram chhungah heroin a hluar hle tih sawiin Lalhmachhuana chuan, “Tun hmain heroin hi a chhin sen tete-te kan man a. Kan lawm viau a. Mahse, tun hnaiah a tam tham zel hi man a ni tawh a, a kg deuh awlh awlhin man tur a awm tawh a ni,” tiin, ruihhlo do turin tun hmaa SRS angte din chhoh leh ngei pawh an beisei thu a sawi.
Myanmar leh Manipur buaina avanga inkalpawhna leh inlaichinnate hi remchangah hmang an awm palh thei a. Chungte chu an indimdawi dawn chuang lo tih sawiin Central YMA president chuan, “Kan dimdawi dawn chuan tual chhunga thalaite ruihhloin a ei chhe nasa dawn a. Ruihhloin min tihbuai lohna turin kan Zo hnahthlak unaute kan ngen mawlh mawlh a ni,” tia sawiin, Zo hnahthlak unaute nen thawhhona tha tak hnuaiah ruihhlo do a, ruihhlo chu um rem theih a nih loh pawhin um tlem theih a beisei thu a sawi bawk.
Lalhmachhuana chuan ruihhlo tih hian drugs lam ringawt rilruah a lan thin lai hian zu lam pawh ngaihtuah a tul ta viau tih a sawi a. Rangvamual leh Phunchawnga zu sakna hmun a tam ta lutuk chu veiawm a tih thu a sawi a. “Drugs ang thoin zu kan chhiatpui tawh niin a hriat a. Zu tha in tur hmu zo loin Rangvamual leh Phunchawnga zu siam an in lo thei si lo va. Heng hmuna zu saknate hi hnatlang neiha han vil leh deuh tur emaw ni tih chu rilruah a awm,” a ti.
Intodelh kawngah Mizo thalaite chu an changkang lutuk hian hnathawh an zak emaw tih mai tur a nih thu sawiin Lalhmachhuana chuan, “Min beltu tur, kan chhehvela Zo hnahthlakte tan pawh belh tlaka kan awm a ngai a. Chuvangin, kan intodelh a ngai a, intodelhna kawngah skills development lamah pawh hma kan lak a tul takzet a ni,” a ti bawk.
MJA President C Lalrambuatsaiha pawhin thu sawiin, MJA leh YMA chu thil tum inang; mahse, kalphung inang lo tak mai a nih thu a sawi a. Ram leh hnam humhalh tih chu YMA-in kumpuan atan an hmang rei ta hle tih a sawi a. Tunah hian ram leh hnamin kil hrang hrang atangin beihna a tawk a, a chhung leh pawn lamah thiam taka dona tawk ve ve a nih avangin, tun hi kum puanah ram leh hnam humhalh puan hun pawimawh a nih thu a sawi.
He hunah Central YMA General Secretary Dr Malsawmliana tar lan danin, tun dinhmunah YMA member mipa 2,86,858 leh hmeichhia 2,03,743, an vaiin 4,90,601 an awm mek a. YMA branch awm zat hi 820 niin, Aizawl City Branch 109 leh Aizawl pawn branch 657 bakah Mizoram pawn branch 54 an awm a. Group YMA hi 50 awmin, Sub-headquarters 8 a awm mek bawk.