ZPM Working President K Sapdanga chuan Pathian zara sorkarna an lo siam a nih chuan an thu tiama an din leh din loh chu mipuiten an buk nghal dawn niin a sawi.
Thawhtannia ZPM-in an party pisa-a chhung inkhawm an neihah K Sapdanga chuan, ZPM party chu ZPM sorkar siam tura piang a nih loh thu leh mipui sorkar siam tura piang, a member-te pawh ram siam tura inpe an nih thu a sawi a. Sorkarna chu party membership atanga siam theih a nih loh avangin neutral te an pawimawh tih sawiin, “Ngawi renga sorkar inrelbawl dan ngun taka lo zir a, an duhna taka vote thlak tute hian sorkar an siam mai. Pathian zara sorkarna an lo siam a nih pawhin kan thu tiama kan din leh din loh chu mipuiten min buk nghal dawn,” a ti.
K Sapdanga chuan, thuneihna an lo chang a nih pawhin chu thuneihna dawhkana dahtu chu a bul berah Pathian a nih rualin, Pathianin hmanruaa a hman chu mipuite an nih thu a sawi a. Mipui duh dana an kal lo a nih chuan a paih thla leh theitu chu mipuite bawk an nih thu a sawi.
Inthlan hma zawngin ZPM chuan an policy te, an manifesto te chu mipui hmaah an keu thin a. Pathian leh mipui zara an lo sorkar ve hlauh a nih chuan, an policy bu tho chu mipuiten an keu khum ang a, an chhiar khum ve thung tawh dawn tih a sawi bawk.
ZPM Working President chuan thu tiam zuk a, ding nghet leh si lote hi mipuiten an ngaithei lo tih sawiin, “Pathian leh mipui zara hnehna kan lo chang mial a nih chuan mipui tanpuina dila kan au kual laia kan candidate ten corruption-a inhnamhnawih hauh lo turin an intiam a, an intiam ang ngeia an din tlang theihna turin keini party mipuite hi tanpui theitu hnai berte kan ni,” a ti.
ZPM an sorkar chuan Val Upa Council te chu an pawimawh leh zual dawn nia sawiin K Sapdanga chuan, “Anni hi hlemhletna laka kan fihlim theihna tura kan chakna thahrui, vengtu rinawm, thlamuantu hnai reng an ni dawn a, anni uapna hnuaiah thianghlim takin mipuite rawng kan bawl theih kan beisei a, eng dinhmun pawh sawisel lova lungawipui turin candidate-te ziakin kan intiam a ni,” tia sawiin, inngaitlawma tawngtaiin Lalpa au a, politics a an luh chhan hi mi mal hamthatna ni lovin ram siam tum an ni tih hre thar leh turin party mipuite a chah bawk.