Kumin thla 10 chhungin Aizawl Traffic Police-in lirthei dan bawhchhia 13,298 an man a, an sum chawi tlingkhawm chu nuai 96 chuang a tling.
Aizawl Traffic Police hotuten The Zozam Times palai an hrilh danin kumin January atanga October, thla chhunga lirthei dan bawhchhia an man zinga dan bawhchhe tam ber chu lirthei ke hnih nei an ni a, 9,283 manin, man tawk zawng zawng tanga chhutin za zela 69.80 a tling a, a dawtah LMV niin, 2,919 man a ni a, a bakah HMV 377, Taxi 595, bus 78, MMV 34 leh lirthei dang 12 te an man.
Thla 10 chhunga lirthei dan bawhchhia man tam ber thla chu March thla kha niin 2,051 an man a, sum chawi tlingkhawm pawh a thahnem hle a, Rs. 15,31,300 lai hmuh chhuah a ni a, man tlem ber thla chu thla kalta, October kha niin, dan bawichhia 872 an man a; sum chawi zat pawh tlahniamin, Rs. 5,82,500 chauh hmuh a ni.