Block Development Officer, RD Block, Bunghmun buatsaihin nimin khan Govt. High School, Bunghmunah ruihhlo do awareness campaign neih a ni.
He awareness campaign hi ‘Nasha Mukt Bharat Abhiyaan (NMBA)’ leh Mizoram sorkar hnuaia ‘Ruihhlo Do’ campaign kaltlanga buatsaih niin, Govt. High School leh Thianbuka Higher Secondary School, Bunghmun atangin zirlai naupang an tel.
He hunah hian H. Lalramenga, BDO, Bunghmun RD Block chuan powerpoint presentation hmangin ruihhloin mi mal, khawtlang leh ram a nghawng dan hrang hrang a tar lang a. Ruihhlo ngawl vei tawhte tan sim leh a harsat em avangin tihchhin loh a him ber tih sawiin, a lo tichhin tawhte pawh ruihhlo laka inthiarfihlim zui hram hram thin turin zirlaite a chah.
B. Lalhlimpuia, Officer-in-Charge, Bunghmun Police Station pawhin ruihhlo kaihhnawih bakah hmeichhia leh naupang humhalhna dan leh hrai pawimawhte a sawi a. Ruihhlo leh chhan dang vanga court-in thiam loh a chantir tawhten sorkar hna dil leh thil dangah harsatna tam tak an tawk thin tih sawiin, zirlaite chu ruihhlo tichhin lo turin a chah bawk.
Bunghmun Branch YMA President Ngurhmingliana Sailo pawhin ruihhlo langsar zual bakah miin ruihhlo a tihchhan tlangpui leh a inven dante a sawi a. Zirlaite chu mihring nun a hun pawimawh tak, adolescent stage-ah an awm mek tih sawiin, tuna an nun hman dan chuan an hma hun thui tak a hril tih a sawi a. Ruihhlo laka fihlim nih tum theuh turin a sawm.
Awareness campaign hi J.L. Chuailova, Headmaster, Govt. High School, Bunghmunin a kaihruai.