European champion ni lai Italy in an lallukhum humhim theihna hun an nei dawn a, Ukraine lakah an mamawh point khat hmu in Euro 2024 khel turin an tling.
Leverkusen a inkhelah hian ram pahnihten goal an khung thei lova, mahse football hlauhawm an khel a, goal khung theihna remchang an nei nual.
Italy hi an intawn hmasak in 2-1 a an chak tawh avangin Ukraine lakah hian tlawm loh bak an mamawh lova. Point inang hmu nimahsela head to head record a that zawk avangin an tling.
Ukraine hi pathumna an nih avangin March thla hian playoff an khelh a ngai dawn thung a ni.
- Inkhel hmuhnawm
Luciano Spalletti pawlte hian inkhel tantir lamah uluk taka an inven a ngai a. Heorhiy Sudakov goal khung tur Italy goalkeeper Gianluigi Donnarumma dansak a tha tak zet.
Lehlamah Azzurri tan Nicolo Barella goal khung tur chu Anatoly Trubin chuan a dansak tha ve hle.
Inkhel a kal rei deuh hnuah erawh Azzurri an langsar telh telh a. Trubin-a’n an ram vawi engemaw zat chhanhim in Davide Frattesi leh Giacomo Raspadori te goal khung tur a dang.
Ukraine hian huntawp dawnah Mykhailo Mudryk laka Bryan Cristante foul avangin penalty an beisei a, mahse pek an ni lo.
- Inkhel zawh lam
Spalletti pawlte hi European Championship-ah a zawnin vawi 8-na atan an khel dawn tihna a ni a. “Thawk lakna hun kan nei a, kan tum ram kan thlen avangin kan lawm thei.”
“Hmalam thlirin hmasawn tura inzir nasat lehzual kan ngai chiah a, tun hun hi a nawm hunlai tak tur a ni.” tiin a sawi.
Ukraine boss Serhiy Rebrov chuan, “Kan ram boruak avangin player-te tan inkhelh a awlsam ngai lo. Tun tum inkhelah pawh khelmual chhungah ram tana inpekna rilru kan lantir a ni.” tiin a naute a fak ve bawk.
- Three Lions tlawm lo
England in Euro 2024 qualifying chu tlawm lovin an khel zova, North Macedonia nen 1-1 in an inhnehtawk.
Tose Proeski Arena a inkhelah tling chiang tawh an nih avangin England manager Gareth Southgate chuan team a siksawi a, heti chung hian chak ngei tura ngaih an ni.
Mahse Skoje khawpuia inkhelah hian England in beisei an pha lo.
Halftime dawnah North Macedonia captain Enis Bardhi chuan an ram hmahruaipui in goal a khung a. Hei hi ani Atanasov own goal hmangin England in an sut.
England hi Group C-ah an sang ber a, tie-draw ah Pot 1 ah an awm ang.