Kum thum a zawna state fai ber Chhattisgarh

Chhattisgarh chu kum thum chhung a zawna India rama state fai ber a ni ta.

Inrinni khan Swachh Survekshan 2023 sem chhuah a ni a, hei hi sorkar laipuiin Swachh Bharat Mission hnuaia kum tin faina kawnga endikna a neiha tithate chawimawina a ni a. Fai ber nihna bakah Chhattisgarh hian Safai Mitra Suraksha Challenge 2023-ah ‘best state’ nihna a dawng bawk.

Chawimawina dawng tura survey hi third party assessment hmanga neih niin mi chengten in tina bawlhhlawh khawn dan kalhmang an hmuh dan te, science thiamna hmanga bawlhhlawh tihriral dan te, pawna inthiar awm lohna khawpui neih dan leh bawlhhlawh awm lohna a nih dan atanga teh a ni.

He endikna hmang hian state leh khawpuite chu fai danah dinhmun pek thin an ni.

Chhattisgarh Chief Minister Bhupesh Baghel chuan Vigyan Bhawan, New Delhi-a chawimawina hlan inkhawm, Swachh Amrit Mahotsav buatsaihah President Ram Nath Kovind hnen atangin a dawng a, an dawn theih chhan chu an state mihring vaibelchhe 2.5-te thawhna vang a nih thu a sawi.

“A bik takin kan state-a kan hmeichhiate ka fak a, khawpui leh thingtlang khuaah te faina hi nunphung tharah an siam a ni,” a ti.

Public relation department-in thuchhuah a siamah chuan, “Chhattisgarh chauh hi ram chhunga in tina bawlhhlawh tawih ral thei leh thei lo tonne 1,600 la khawma science thiamna hmanga tha taka tiriral theitu, cleanliness ‘didi’ 9,000 chuang nei awm chhun a ni a. Sorkar laipui chuan ODF++ state hmasa berah a puang bawk,” tiin tar lan a ni.

Chhattisgarh thuneitute chuan an state-ah hian hmeichhia 10,000 chuangin faina kawngah hian tha tam tak an thawh tih an sawi.

Leave a Reply

error: Content is protected !!