French rawlthar fak hlawh tak Warren Zaïre-Emery chu kar engemaw zat inkhel thei lovin a chawlh a ngai dawn a. France tana a inkhelh hmasak berah a inhliam tih national team coach Didier Deschamps chuan a sawi.
Kum 17 mi Zaïre-Emery hi Inrinni zan khan Gibraltar laka goal 14 an khung zanah a vawikhatna atan ram tan a inkhel a. An ram chanchin kum 100 chuang hnua goal khung thei naupang ber a ni bawk.
He inkhelah hian a ball pet tur Gibraltar defender in a ke dinglamah a tlawh avangin a inhliam a. Deschamps chuan a hliam chu endik a nih hnuah ruh tliak awm lo mahse hun engemaw chen chawlh ngai tur a nih thu a sawi.
“Inhliam na a la ni thova, chuvangin dam chiang turin kar engemaw zah a chawlh a ngai ang. Hetiang inkhelah hi chuan player inhliam neih hi a hlauhawm a, lehlamah chuan tun aia na zawk a nih theih avangin a lawmawm lai a awm tho.” tiin a sawi.
Zaïre-Emery hian tun season-ah Paris Saint-Germain tan season tha a hmang mek a. UEFA Champions League a an inkhelah a la khel tluan vek a, thla hmasa a AC Milan laka 3-0 a an chak zanin kheltha hle in an goal khung zinga goal hnihah a inrawlhdan a pawimawh.
A inhliam chhung hian Ligue 1-ah Monaco, Le Havre leh Nantes te bakah Champions League group stage match hnuhnung pahnih khel thei lo tura ngaih a ni.