Manipur police chief hnenah cabinet minister pahnih telin, Chin-Kuki-Zomi-Hmar MLA 10-te lakah dan anga hma la tura thehluh a ni a, heng mite hi ‘Meitei leh Kuki inkara inhuatna leh inhalna thlennaah tel’ nia puh an ni.
Manipur Police Director General Rajiv Singh-a hnena lehkha thehluttu hi Khaidem Mani a ni a. Tun hmain Manipur Human Rights Commission-ah acting chairperson a lo ni tawh a, advocate hlun tak niin tun hnaia pawl thar ding, Taragi Cheisu-a an chairman a ni bawk.
A lehkha thehluhah hian MLA 10-te hian ualau takin Kuki-Zo mite tan Manipur awm reng laiin inawpna hran an ngiat niin a puh.
He an thil ngiat hian hnam hnihte inkarah inhalna, inhuatna leh inngeihna lo siamin May 3-a inthah tawnna pawh kha a thlen phah niin a sawi.
MLA 10-te hi rorel lai, BJP kaihhruai sorkara telte vek an ni a. Pasarih hi BJP an ni a, pahnih chu KPA (Kuki People’s Alliance) niin independent MLA pakhat a awm bawk.
Mani-a’n DGP hnenah lehkha a thehluhah hian May 12-a heng tribal MLA-ten thuchhuah intawm an siamah pawh tharum thawhna chuan state chu a thendarh a, chu chu chuan Manipur-a inawpna hran a awm a hring chhuak nia an tar lan thu a tar lang.
May 15 khan heng mite bawk hian Union Home Minister Amit Shah hnenah memorandum thehlutin inawpna hran tho an ngiat tih a tar lang bawk.
Mani-a hian a lehkhaah hian heng thil avang hian ‘dan anga a hma thei anga hma laa dikna hlen chhuak ngei turin DGP chu a phut’ tih a ziak lang a, chu chuan buainain a tuam mek state-ah muanna a thlen dawn niin a tar lang bawk.