- Ruata
Honda Motorcycle & Scooter India chuan retro classic CB350 bike an tlangzarh thar a, he bike hi Rs Nuai 2 (ex-showroom, Delhi) man atangin a intan dawn a ni.
He bike hi tuna chhuak mek CB350 model ho nghahchhana duan niin design erawh a thar hlak a ni a. He bike thar hi duh tan chuan BigWing dealership-ah book theih a ni a. He bike hi media report hrang hrangin an tarlan danin Royal Enfield 350cc bike ho el tura duan a ni a. Market lamah pawh an inel ang a, Royal Enfield ho hi nasa takin inelna a rawn siamsak ang em tih chu zawhna lian tak a ni a. Khuareiah kan la hre chho zel dawn a ni.
Honda 350cc ho hi Mizoramah ngei pawh hralh an kal tha viau a. Retro style design Honda bike hlu tak leh to uchuak lo a ni a. Honda bike hlutna leh design hlu tak la vawng nung zel tu bike zinga mi niin tunah pawh market lamah pawh an che chhe lo hle a ni. Hetihrual tuna CB350 chhuak thar in a el tur Royal Enfield bike ho, a bik takin Classic 350 pawh hi tun dinhmunah bike hralh kal ber model te zinga mi a ni mek bawk a. He inelna tur hi a ngaihnawm zual dawn viau a ni.
Honda CB350 thar hi chi hnih – CB350 DLX leh CB350 DLX Pro te a awm a. Heng bike te hi a indawt danin Rs Nuai 2 leh Nuai 2.18 (ex-showroom, Delhi) man te an ni a. Honda chuan special 10 year warranty package (3 year standard + 7 year optional) te he retro-classic bike tharah hian an pe dawn a ni a. Bike tha leh tlo a nih bakah company atanga hetiang after sales service tha lutuk hi chu a leitu tan chuan thlamuanpuiawm tak tur a ni dawn a ni.
- Eng nge CB350 tharah kan hmuh dawn?
Honda CB350 hian Royal Enfield Classic 350 bakah Jawa Classic te a rawn el thei dawn a. He bike hian fuel tank lian tak bakah all-LED lighting system (LED Headlamp, LED winkers & LED tail-lamp) te a nei a. A ti retro turin round-shaped headlamp, metal fenders sei, front forks metallic covers leh split seat te a awm a ni.
Honda CB350 thar hi rawng chi 5, metallic leh matte tea duhthlan tur a awm a. Heng rawng te hi Precious Red Metallic, Pearl Igneous Black, Matte Crust Metallic, Matte Marshal Green Metallic leh Matte Dune Brown te a ni a. A kentel hrang hrang zingah hian digital-analogue instrument cluster Honda Smartphone Voice Control system (HSVCS) nei tel, assist & slipper clutch, Honda Selectable Torque Control (HSTC) system tihte a nei a. He bike hi he HSTC hian a ti him dawn hle a ni. He bike thar hian emergency stop signal feature neiin hei hian din thut a ngaihin a rawn hrilh thei dawn a ni.
- Thil dang
He bike hian telescopic front forks leh pressurized nitrogen-charged rear suspension te a nei a. Brake lamah chuan CB350 hian a hmalamah 310mm disc leh a hnunglamah 240mm disc hmangin dual-channel ABS kan hmu bawk a. 18-inch wheel hmangin 130-section tyre a hmang bawk a ni.
A khawl lamah chuan he retro classic bike thar hian 348.36cc, air-cooled, 4-stroke, single-cylinder BSVI OBD2-B compliant PGM-FI engine a hmang a. He khawl hi H’ness leh CB350RS te pawhin a hman ang a ni a. 5-speed gearbox neiin he khawl hian 20.7hp power chu 5,500rpm-ah a pechhuak thei a. 29.4Nm torque chu 3,000rpm-ah a pechhuak thei bawk a, tarlan tawh angin assist & slipper clutch a hmang bawk a ni.