Kuminah eiruk thubuaiah mi 17 thiam loh chantir

Court of Special Judge (Prevention of Corruption Act) chuan kumin chhungin eiruk thubuaiah mi 17 thiam loh chantir a nei tawh.

Aizawl District Court of Special Judge (PC Act)-a thawktuten an sawi danin kumin thla 10 chhungin court chuan eiruk thubuai hrang hrang 10 a ching fel tawh a, heng thubuaiah hian eirua puh zawng zawng thiam loh chantir an ni vek lo a, an eiru ngei nia hriat finfiah thiam loh chantir hi mi 17 an awm.

Eiruk thubuaia thiam loh chantir tak mi 17 zinga mi 15-te chu Mizo an ni a, a bak mi pahnihte chu hnam dang an ni a. Heng mite hi jail tang tur leh pawisa chawi tur tea hrem an ni a, jail-ah dah luh hlawm ni mah se a tam zawk chu bail-a chhuah leh an ni tawh.

Court-in eiruk thubuaia thiam loh a chantirte hi sorkar hnathawk lai mek te, officer pension tawh te leh Chakma Autonomous District Council-a chairman ni lai te an ni a, sorkar hnathawk ni lo, civil mite pawh an tel a ni.

Kumina eiruk thubuai chin fel takte chu ‘Turial Hydro Electric Power Project siamna atana ram laka zangnadawmna dik lo taka lak’ thubuai te, ‘Serchhip District Excise & Narcotic office staff hlawh tihchingpen’ thubuai te, ‘Fu chingtute loan rulhsakna tur sum tihchingpen’ thubuai te, ‘Civil Hospital, Aizawl tihchangtlunna tur sum tihchingpen’ thubuai te, ‘NLCPR fund campaign nana sum lo hman’ thubuai bakah mi malin sorkar sum an lo chheprelhna dangte a ni.

Tun dinhmunah thubuai ngaihtuah tur, pending case 16 awm mekin chung zinga paruk chu Central Bureau of Investigation (CBI)-in an chhui zui a ni a, a bak case dang chu Mizoram sorkar hnuai Anti Corruption Bureau (ACB)-in an buaipui a ni.

Nikum 2022 chhung khan Court of Special Judge (PC Act) chuan eiruk thubuai pakua ching felin, heng thubuai hrang hrangah hian mi 12-te chu thiam loh chantirin jail tang tur leh sum chawi turin hrem an ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427