Aizawl: Mizoram University Teachers Association (MIZUTA)-in tun hnaia Education department HOD chet dan chu chhui fiah a, a tul anga hma la turin MZU Registrar hnenah ngenna lehkha an theh lut.
Tun hnai khan social media-ah, “Vawiin, November 15, 2023 : Research Scholar-te’n an Progress Report an pek lai hian, department-a HOD chu lecturn atana siam smart TV-ah cricket match enin a buai hle a. Faculty dangte bakah research s holar-te zah lohna a ni. MZU-ah hian hetiang hi a thleng tih ka ring lo,” tih chu thehdarh a ni. He thil thleng hian Education HOD-in MZU timualpho thei anga a lan avangin, MIZUTA chuan an ngai thutak hle tih an sawi.
The Zozam Times zawhna chhangin MIZUTA President Prof John Zothanzama chuan, “Social media atangin keini pawhin kan lo hria a. Mahse, a department atang erawh thu chiang taka sawi a awm lo thung a. Chutih laiin, thil tak tak thleng a ni tih erawh chu thu kan dawng tho a,” a ti.
Education HOD-in MZU a tihmualpho thei anga a lan avangin MZU Registrar hnenah complaint an theh lut tih sawiin Prof John Zothanzama chuan, “MIZUTA chuan he thil thleng chungchang hi chhui chiang a, a tul anga action la turin MZU Registrar hnenah ngenna lehkha kan theh lut a. Mahse, tun thlengin an hmalakna awm thawm kan la hre lo,” tia sawiin, MZU-ah ngei hnam dangin mi dang zah lova zalen taka a awm chu inenfiah a tul thu a sawi.
MIZUTA president hian, Teachers Association anga MZU Registrar hnena hma la tura ngenna an theh luh bakah, a mi mal angin MZU Vice Chancellor hnenah pawh thil thleng niawma an hriat chu a tul anga hma la tura an thlen thu a sawi.
MIZUTA bakah Students Council lam atang pawhin he thil thleng chungchang chhui fiah a, action la tur lam hawiin lehkha theh lut nia a hriat thu, Prof John Zothanzama’n a sawi bawk.