Aizawl: ZPM party-in MLA inthlanpui neiha vote chhiar hun sawn tura NGO Coordination Committee hmalakna an thlawp thu an puang.
Nimina Republic Veng YMA Hall-a ZPM Office Bearers thukhawma resolution an siamah, Election Commission of India in vote chhiar hun atan Kristian te ni pawimawh, December 3, 2023 (Pathianni) a ruat chu pawi an tih thu an sawi a. Vote chhiar hun hi Election Commission of India hnenah sawn tura ngenna ziakin tum hnih, ZPM President Lalliansawta hminga thlen tawh thu leh, an party mai bakah Mizoram Kohhran Hruaitu Committee te, NGO Coordination Committee ten theihtawp chhuahin vote chhiar hun sawn a nih theih nan hma an la mek chu an thlawp tlat thu an tar lang.
ZPM OB thutkhawm chuan, kum 2023 MLA General Election chu boruak muanawm tak hnuaiah tluang taka neih zawh a lo ni ta hi lawmawm an tih thu an sawi a. Inthlan tluang taka neih a nih theihna atana buaipuitu zawng zawng chungah lawmthu an sawi.
Mizoram People Forum (MPF) te nena an thawhhona thuthlung an zawm tha hle chu lawmawm an tih thu sawi bawkin, hun lo kal zel turah MPF leh party te thawhhona thuthlung changtlung zawk nen hma lak zel nise an ti.
‘Kalphung thar, Mipui Sorkar’ a pian ngei theihna atana theihtawp chhuahtu zawng zawng chungah ZPM General Headquarters chuan lawmthu an sawi tih sawiin, “Zoram hmun hrang hranga kan party mi leh sa mai bakah, Zoram chhung leh pawn atanga ZPM thlawp a, kan candidate te tana theihtawp lo chhuahpuitu zawng zawng chungah lawmthu kan sawi tak zet a ni,” an ti bawk.