December, 2019 hma hian Delhi sorkara Public Works Department (PWD)-in a enkawl in (building) 500 chuang chu pianphunga rualbanloten awlsam taka an chuankai theih nan siam thar vek a ni dawn.
Member panga awmna, PWD-in committee a dinin rawtna an neih angin heng inte hi rualbanlote tana awlsam tura her danglam an ni dawn a. Committee hian The Rights of Persons with Disabilities Act, 2016-in a beisei leh phut ang ti tur hian rawtna an siam a ni.
Superintendent engineer-level officer-in a kaihhruai committee hian Delhi khawpui chhunga kawng 763 zet pawh rualbanloten awlsam taka an hman ve theih tura siam that turin an rawt bawk a, hei pawh hi tih tum a ni a. An rawtna leh report chu PWD minister Satyendar Jain hnenah an thlen a ni.
“Rualbanlote tana awlsam tura khawpui chhunga thil awmte siam tura hmalakna hi a muang kan ti hle a; mahse, tunah chuan a bul tanna tur peih a ni ta a, thawh leh tih tur tam tam erawh a la awm,” tiin T.D.Dhariyal, Persons with Disabilities, Delhi-a an Commissioner chuan a sawi.
Committee-in report an siamah chuan Delhi khawpui chhunga vantlangin an hman in (public utility building) 560 zinga 375 an endik a, damdawi in 14 pawh a tel a. Heng damdawi in 14-ah te hian rualbanlote tana awlsam tura dah belh turin an rawt a, an rawt ang hian dah belh a ni dawn a. “Rualbanlote tana awlsam tura vantlang hmunte siam hian ram chhung khawpui ber chu khawvel huapa khawpui tha, smart city-ah a chantir thei ang,” tiin an rawtnaah hian an ziak tel a ni.
Delhi University-a Equal Opportunity Cell-a an nodal officer Anil Aneja chuan, “Hmalakna hi a muang thin a, sorkar hian a tul ang hi uluk taka a en hmasak a ngai thin a, tun tumah hian a thua thamral leh mai lo turin thil ti tak tak se a tha ang,” tiin a sawi.