Croatia chu Euro 2024 khel tura tling hnuhnung ber ni turin an dinhmun an tichiang a. Armenia laka an chak avangin Euro qualifying atanga tling chiang nghal turte an kim tawh.
Thawhlehni zanah Stadion Maksimir ah Croatia hian 1-0 in hnehna an chang a. An result avang hian Group D-ah pahnihna an ni chiang tawh a. Wales in play-offs an khel ang.
- Croats an kal zel
Mahni mualah Croatia hian Wales in Turkey laka result an neih ang tal an tluk a ngai tih hria in inkhel an hmachhawn a. Pahnihna nih an inchuhpuite hian minute 7-naah goal an khung nghal avangin an tan chak ngei a pawimawh hma hle.
MahseZlatko Dalic-a pawlten an mikhualte an thunun hneh. A tir minute 15 chhungin 75% possession neiin goal hlauhawm tum riat lai goal an khung hma in an nei hman.
Halftime hma minute hnih a la awmin Borna Sosa ball cross chu Ante Budimir-a’n thiam taka amah vengtu tlan khalhin goal-ah a tauh lut a. Tun qualifying-ah a vawikhatna atan goal a khung.
An goal hnihna a khung belh erawh pawm a ni lova, nimahsela Croatia in tun qualifying a halftime a hma an hruai tawh an thlah leh tawh loh chu an chhunzawm zel thei a ni.
Croatia hian kum 2004 atangin European Championship an la khel vek a, kum 2010 atang international football tournament lian an la khel vek.
An captain leh rinrawl kum 38 mi midfielder Luka Modric chu tun nipuiah a inhliam lo a nih chuan ram tana major tournament vawi kua a khelhna a ni ang.
- Inkhel dang
Tling chiang tawh France in Euro 2024 qualifying-ah hnehna la chang vek mahse a tawp berah point an hloh a, 2-2 in Greece nen an inhnehtawk.
Athens a inkhelah hian France tan Paris St-Germain forward Randal Kolo Muani chuan goal a khung chu Anastasios Bakasetas chuan a sut a. Fotis Ioannidis hmanga Greece in goal an khung leh hnuah France tan substitute a dah Kylian Mbappe chuan Youssouf Fofana goal khung tur a siamsak a ni.