Zote Toyota Mizoram Premier League 10 a inkhel awm tawh zinga la pawimawh ber pawl chu Nilaini khan khelh niin Chhinga Veng FC in Aizawl FC lakah 1-0 in hnehna an chang.
I-League khel Aizawl FC in a ruala league pahnih an khelh avangin squad chhah an mamawh a, Thawhlehni zanah an inkhelh hnuah a tukah tualchhung league an khel lehnghal.
Kumin I-Day a inhmachhawn tawh team pahnihte league a an intawn lehnaah Chhinga Veng lamin halftime zawh hnu lawkah goal awmchhun Johny Lalremruata hmangin an khung.
Season chawhma lama beisei anga result nei tha lo Chhinga Veng in an dinhmun an siamtha a, palinaah an inhlangkai.
Hetihlai hian match hnih khelh zawn Aizawl FC tan a hautak a, player siksawi nasat an ngaih an tuar tih a lang.
Season chanve chawlhlaia inhrual tha tak Chhinga Veng lakah nidanga an khel an tluk lova, hnehna chan phu zawkin point thum an hawn.