Vote kan thlak zo a. Inthlan result chhiar kan nghak ta thup mai. Party tinin sawrkarna siam an inbeisei a. Tunge sawrkar dawn hriat a ni lova. Beiseina leh hlauhthawnna nen an thu thup niin a lang.
Sawrkar kan hmuh tur hi tu in nge kaihruai ang le. Zpm hian sawrkarna an la thut thei a, chutih rual chuan rorel lai mnf pawh mipuiin lo ning deuh tawh mahse sawrkarna khawp Mla an la nei thei. Tun, tu mah mahin sawrkarna nei bik lo in Mla engemaw zat Congress in an lo neih bawk si chuan sawrkar intawm a piang nawlh thei bawk. Amaherawhchu kan ramah hian vote chhiar hnua inzawmkhawm chawp sawrkar intawm (coaliation goverment) hi a la ding ngai lova. Kan vawikhatna pawh ani thei tho bawk a.
Engpawh nise, sawrkar thar kan nei dawn. Mnf pawhin sawrkarna chang leh mahse sawrkar thar, a thara thutiam la leh tur tho an ni. Sawrkar thar kan tih hian kan beisei dan a inang lo hlawm viau mai thei. Thenkhat chuan thil zawng zawng hi danglam nghal deuh duak duak turte pawhin an beisei ang. Thenkhat erawhin mahni chanvo bo duak tur pawhin an lo inring thei bawk.
Hetiang karah hian kan beiseina neih hi chin tawk neih a tha a. Mi thenkhat kumthar beisei chuan thil hi danglam deuh vuk turin an ngai thin. Mahse, krismas leh kumthar kan han hmang laih laih a. Kum chu a lo thar ta ngei mai thin a. January thla atang chuan a kal ngai tein a kal leh beuh beuh thin ang hian, sawrkar thar pawh hi nei ila thil hi a inthlak rup rup dawn lo a. Kan ram kawngte hi vawilehkhatah a tha thut dawn lova. Kan sawrkar hian sum leh pai a nei tam thut dawn hek lo. Sikul naupangin BA pass turin kumtharah a zirlai a chhunzawm leh bek bek ang hian ram hmasawnna lamtluang zawh turin kan pen leh chhet chhet dawn. Kan sawrkar administration pawh chuti thut a danglam thei ani chuang lova. Hnathawktu officer leh staff te kha a ngai tho an la ni dawn a. Nitin office an kal leh mai dawn a ni. Zirtirtu in a naupang te tho a zirtir leh thin ang hian kumthar leh sawrkar tharah hian kan kawng ngai kan la zawh dawn. Kuthnathawktu in a lo neih a bansan ngawt thei lova, a feh liam leh a ngai tho tho mai dawn tihte hi hriat chian sa a ni a. Beiseina sang lutuk nena sawrkar thar lo thlir hi a finthlak ber loh ang.
Ram hmasawnna hi vawilehkhata thleng thut ani ngai lova. Zawi muang a inthlak chho det det (gradual change) a hmasawnna hi kal a ni. Inthlan laiin tuten emaw hmasawnna chu a zuana zuang duai duai turin min lo sawihmuh ani mai thei. Hei hi khawvel kalhmang ani lo tih hi i chiang ang u. Kan tih theih theuh chu eng sawrkar pawh lo piang se mahni hnaa rinawm taka thawh mai hi ram hmasawnna kalkawng dik tak zawhna chu a ni. Mi tinin rinawm leh taima taka kan hna theuh kan thawh hian ram chuan hma a sawn mai dawn ani zawk a. Beiseina sang lutuk neihte hi beidawnna khura min hnuk luttu ani zawk thei tih hre rengin kan sawrkar thar tur hi lo hmachhawn ila. Sawrkar chuan a tih tur a rawn ti ang a. Sawrkar tha kan neih chuan chhungkaw tinah hmasawnna chu a rawn kal mai ang. Hmasawnna hi vana rah ang ani tihna lam nilovin, kan nitin ke pen dan azira lokal tur a ni zawk.