Chief Electoral Officer (CEO) Madhup Vyas chuan nimin khan Mizoram district hrang hranga District Election Officer (DEO)-te chu Mizoram state assembly inthlanpui atana vote chhiar chungchanga inpuahchahna an kalpui tawh dan leh hmachhawp an neihte a sawipui.
Biak hmuh theih kaltlanga an inkawmnaah hian CEO Vyas chuan vote chhiar tura inpuahchahna chak taka kalpui chhoh mek a nih thu a sawi a, Election Commission of India ruahman angin November 27, 2023 (Thawhtanni)-ah vote chhiar chhinna ‘full dress rehearsal’ encore portal hmanga neih tum a ni a. Hei hi harsatna awm lo tura lo inruahman lawk vek turin DEO-te chu hrilhin chawhnu dar 3-ah report kimchang pek vek hman tum turin a chah.
CEO chuan vote chhiar hun, counting day bik atan ECI-in counting observer 40, bial tin tan pakhat zel a ruat thu a sawi a. DEO-te chu RO Handbook tha taka rawn thin tur leh, district magistrate an nih angin dan leh thupek kenkawh kawngah ruahmanna felfai taka siam turin a chah bawk.
Vyas chuan inthlan vuakveta thil chhinchhiahtlak leh dangdai, entawntlak tak nia ngaih, ‘best practices & innovation’ an neihte CEO Office-ah November 30, 2023 ral hma ngeia theh lut hman tum tur leh an district chhung theuha inthlan duty official hna thawk tha, chawimawi tlak nia an hriatte chu ziaka thlen turin a chah.
Thutkhawmah hian DEO 11-ten vote chhiar hun atana inpuahchahna kalpui dan tlangpui leh hmabak la awmte an sawi hlawm a. Tun dinhmunah harsatna awm lova vote chhiar tura inpuahchahna tha taka kalpui mek zel a nih thu leh zawhfel thuai beisei a nih thu an sawi hlawm.
Thutkhawmah hian EVM, Postal Ballot leh ETPBS/ ETPBMS hmanga vote tla chhiar dan tur chungchang te, counting hall luh leh chhuah dan tura ruahmanna siam leh a hungna siam chungchang te, daltu awm lova him taka strong room atanga counting hall-a EVM thiar dan tur te, vote chhiar nana dawhkan leh hmanraw mamawh dang ruahman dan chungchang te sawiho a ni a. Dan leh thupek kenkawh dan tur leh venhimna khauh taka kalpui dan tur pawh an sawi ho.
Heng bakah hian media centre mumal tak siam leh round tin result-te mipui hriat tura puanzar nghal zel dan tur te, ECI duh dan anga boruak muanawm tak hnuaiah felfai taka vote chhiar a nih theih nana hmalak tul te, a hun taka vote chhiar tan bakah a hma thei ang bera zawh fel a nih theih nana counting supervisor, counting assistant, micro observer, staff dang, hmanraw mamawh leh tul pawimawh dang ruahman a nih dante bakah, traning leh randomisation kalpui tawh dan leh hmabak awmte pawh an sawi ho bawk.
CEO hi H.Lianzela, Addl. CEO-I, Amol Srivastava, Addl. CEO-II, James Lalnunmawia, Jt. CEO, R.Vanrengpuia, Dy. CEO-I leh Henry C.Lalrawnkima, Dy. CEO-II ten an tawiawm a ni.