Aizawl: National Highway 54 kawngpui laih mekah Serchhip district huam chhunga sorkarin ram a lak fel tawh, dan anga zangnadawmna dawng tawhte zinga an in leh lo thiat duh lote chu November 27, 2023 hmaa thiat vek tura hriattir an ni.
Nilaini khan Serchhip Bawrhsap David Lalthantluanga chuan Chhingchhip leh Chhiahtlang khuaa NH54 kawng laih mek a tlawhin, zangnadawmna dawng tawh zinga mahni in la thiat duh lo awmte a enfiah a. Heng mite hi kumin July leh August thla khan magistrate-ten an inah kalchilhin August thla chhunga thiat ngei tura thiat tura an ngen tawh chungin vawiin thlenga thiat lo la awmte chu chawlhkar tharah chuan dan anga an chungah hremna leklawh an nih tur thu a hrilh a ni.
November 27, 2023 ral hmaa mahni in thiat duh lote chu IPC Section 188 hmangin thubuai siamsak an nih tur thu leh jail tan thlengin hrem theih an nih thu leh magistrate kaihhruaiin an in leh lote chu nawr chhiatsak an nih tur thu Serchhip bawrhsap chuan a sawi a. Hetianga dan anga hremna an chunga lekkawh kher a ngaih lohna turin Serchhip district chhunga khaw hrang hranga in thiat duh lo la awmte chu thiat vek turin a hriattir nawn leh a ni.
Serchhip district chhunga NH54 kawngpui laih mekah hian zangnadawmna dawng tawh zingah zaa 93 chuan an inte an thiat fel tawh a. Mi tlem tê chauh thiat lo an awm tawh a. Heng khaw hrang hranga village council te, khawtlang hruaitute leh khawtlang mipuiin kawng tha a awm theihna tura sorkar hmalakna an thlawp tlat avangin district thuneituten lawmthu an sawi.
March, 2024 chhung ngeiin sorkar laipui chuan NH54 kawngpui laih mek hi hawng hman ngei turin a hriattir a. Kawng laitu company-te hi December, 2023 thla chhunga thawk zo turin sorkar laipui chuan na takin a nawr bawk.