Aizawl : Nimin khan DHS Conference Hall (Old building) Dinthar-ah Ministry of Health & Family Welfare Central TB Division atanga Joint Supportive Supervisory Mission lo kalte leh state officials ten inkawmhona an hmang.
He interaction meeting hi Dr. Eric Zomawia Mission Director NHM in kaihruaiin LAD department leh MSACS aiawh te, State Programme Manager NHM leh NHM lama State Nodal Officer-te an tel a ni.
Thuchhuahin a tarlan danin Ministry atanga lo kalte hi Dr. Nishant Kumar Joint Director (Public Health) in a rawn ho a. Central team-te hi TB Programme hmalakna endik tur leh pui tura lo kal an ni a. Kum 2025-ah India ram atanga TB umbo tum anih avangin TB programme hnathawh te endik tur hian kum tin an lo kal thin a ni.
Central team hian Aizawl khaw chhunga Private Hospital hrang hrang leh Laboratory te, District TB Centre Falkawn leh Health and Wellness Centre te an tlawh a. Lunglei district an tlawh bawk a ni.
State TB Cell report-in a tarlan danin:
• Tun dinhmunah kumin 2023 January atanga October thla thlenga TB rinhlelh test zawng zawng hi mi 12,309 a ni a. Hei hi mi nuaikhat zelah mi 933 test ang a ni.
• Kumin January atanga October thla thlenga TB vei hmuh chhuah hi mi 1929 a ni a. Heng zingah hian MDR TB vei 122 hmuh chhuah an ni. MDR-TB vei tihdam zat hi 70% a ni.
• Tar lan theih chinah kumin January atanga June thla thlenga TB vanga thi zat hi mi 62 an ni tawh a. TB tihdam zat chu 83% a ni. Tin, TB leh HIV vei kawp hi 12% a ni.