Aizawl : Ni khat awh Mara Autonomous District Council (MADC) thlasik thutkhawm (Winter session) chu nimin khan MADC Session Hall-ah neih a ni.
MADC thlasik thutkhawm hi MADC Chairman N Viakhu chuan a kaihruai a. Thutkhawm tan hnuah November 13, 2023-a boral, Mara rama missionary hnuhnung ber Rev Violet Louise Anne Mark sunna hun hman a ni a. Chairman in Rev Violet-i chanchin a chhiar chhuah hnuah House Leader bakah member atangin Nahlo Solo leh HC Lalmalsawma Zasai, H. Malvin, N. Zakhai, MH Tiabi leh Beirahmo Syuhly te’n sunna thu an sawi a. Hemi hnu hian memberte’n minute khat ngawi rengin Rev Violet-i sunna hun an hmang a ni.
Thutkhawmah hian Official Rules pahnih – The Mara Autonomous District Council (Fisheries Department Group A, B & C) Recruitment Rules 2023 leh The Mara Autonomous District Council (Environment & Forest Fisheries Department Group B & C) Recruitment Rules, 2023-te chu house-ah Tiahlei, E.M. Forest & Fishery in a put luh chu sawiho a nih hnuah pawm a ni.
Tun tum session-ah hian zawhna lut a awm lo a ni.