Erling Haaland chuan Manchester City in naktuk zan a Premier League inkhela Liverpool an hmachhawn hunah a khel ve thei dawn a, ram tana a inkhelhin inti na mahse tunkarah club training pangngai a zawm.
Tun season a Premier League goal 13 khung tawh Manchester City striker hi kar hmasa Ningani a Faroe Islands nen friendly match an khelh tumin a kheimit a ti na a. Scotland nen Euro 2024 qualifier a an inkhelah a tel ve theih loh phah.
Norway team doctor chuan Haaland chuan a hliam chu na a ti viau a, tun season a Bournemouth nen an inkhelh tuma a hliam neih tawh niin a tihnat belh niin a sawi.
Tunkar khan club-ah inenkawl turin a kir leh a, manager Pep Guardiola tan chanchin lawmawm ni turin Ningani atang khan team training pangngai a zawm leh thei a. Tun kartawpah Liverpool a hmachhawn ve thei dawn niin a lang.
Manchester City lam hian kum 23 mi hi a fit tha tawh tih an social media kaltlangin thlalak thenkhatah an ti lang bawk.
Hetihlai hian City in inhliam avanga buaina an neihah Haaland chauh hi a ni lova. Goalkeeper Ederson pawh tunkarah a dinhmun ennawn leh a ngai dawn nia sawi a ni bawk a. Anni pahnih bakah hian defender Nathan Ake leh Sergio Gomez te pawh ennawn leh ngai tur an ni.
Portugal tana ko a nih hnua a fit loh avanga squad a tel lo Matheus Nunes pawh chhawr theih loh tura ngaih a ni.
Liverpool lamin fitness en that ngai player an nei ve nual thova. Midfielder Ryan Gravenberch chu a khup hliam avangin tunkarah enfiah leh tur a ni a. Joe Gomez, Curtis Jones leh Ibrahima Konate te pawh hliam an neih vanga endik leh ngai vek an ni bawk.