China-ah chawlhkar khatah billionaire pahnih zel awm belh

China-ah chuan mi hausa an pung chak hle a, kum kalta chhung khan chawlhkar khat chhungin mi hausa tawntaw (billionaire) pahnih zel an awm belh hman niin Swiss banking giant UBS leh auditors PwC chuan a sawi.

Billionaire-te hausakna hi khawvel pumah nikum chhung khan a pung chak em em bawk tih an sawi a. Billionaire hi khawvel pumah mi 2,158 awmin nikum chhungin an hausakna hi 19% zetin a pung niin an sawi a, chu chu $ trillion 8.9 theuhva nei ang an ni.

Mi hausa tawntaw zingah pawh Chinese billionaire-ho hausakna a pung chak hle a, an hausakna hi 39% zet maiin a pung a, $ trillion 1.12 zet an nei a ni.

UBS Global Wealth Management-a Ultra High Net Worth hotupa, Josef Stadler chuan, “Tun hnai kum 10 chhung khan Chinese billionaire-te hian khawve company lian ber ber leh hlawhtling ber ber an din nasa hle a, hei hian an hausakna pawh a tipung thur thur a ni,” tiin a sawi.

China-ah hian mi hausa tawntaw an tam tawh hle chungin an pun zel pawh a rinawm tih Stadler chuan a sawi a, “Tun hi a bul tanna ang chauh a la ni a. An ram mipui tam tak leh technology lama an thiamna sang tak te, sorkarin a tawiawm thatna te hi mi tin tan remchanna a siamsak a, an ram mipuite khawsak phung hi a changkang tawlh tawlh zel a ni,” a ti.

He report-a a lan dan chuan China-ah hian nikum chhung khan chawlhkar tin billionaire thar mi pahnih an awm zel anga ngaih a ni a. Asia khawmualpui pumah billionaire an pung chak hrim hrim a, chawlhkar tin pathum awm belh zel ang a ni.

America ramah mi hausa tawntawte hausakna a pung chak vak lo thung a, 12% chauhva pungin $ trillion 3.6 nei anga ngaih a ni a. United States bik chuan nikum chhungin billionaire thar 57 neiin kum 5 kal ta khan kum khatah 87 zet an awm hman thung a ni.

Pawisa hlutna insiksawi reng karah Europe-a mi hausa tawntawte hausakna chu 19%-a thangin billionaire pawh 4%-in an pung a, billionaire hi 414 an nei tawh.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427