- Huna Kawlvawm
Assam Public Service Commission (APSC) chuan Assam Cabinet-in thu tlukna alo siam tawh angin Assam Civil Service(ACS), Assam Police Service (APS) etc exam-ah kum 2023 ațanga hman TURIN Optional subject a telh țhin chu a ti tawp. He thu hi tun hnaia tu rel leh thil thleng thar a ni lo, December 7, 2022 a Assam Cabinet thu rel tawh a ni.
Assam Public Service Commission (APSC)-in Assam state chhunga officer – Assam Civil Service (ACS), Assam Police Service (APS) leh allied service officers te lakna tura Combined Competitive Exam ah Optional subject awm țhin chu tih tawp a ni.
He thu tlukna huaisen, lian leh pawimawh tak hi Assam Chief Minister Himanta Biswa Sarma chuan Assam Cabinet an rel zawhin thu thar theh darhtute hnenah a sawi.
Assam Cabinet in APSC-in ACS/APS exams buatsaiha Optional paper a hnuhkir chhan chu Optional paper a zawhna chhuak țhinte a harsa hlei țhin hle a, hei hi țhelh leh tih tawp dan a awm hlei thei lo a, subject vannei/vanduai bik kumtin a awm țhin vang leh subject tina zirlaite hmakhawngaihna anih thu Assam CM Himanta Biswa Sarma chuan a sawi.
A sawi zel dan chuan, “Kum 2023 ațang chuan APSC exam buatsaihah optional papers a awm tawh lo ang. General Studies lamah subject zawng zawng a rualkhai thei ang ber tura dah a ni thung ang,” a ti.
“Mi tupawh ACS/APS officer etc nih tum chuan subject zawng zawngah basic knowledge tal a thiam tur a ni,” Assam CM Himanta Biswa Sarma chuan a ti.
A sawi zel dan chuan : “Mi tuin emaw Optional subject atan mathematics or science thlang ta se, an thiam miau si chuan mark sang tak 100% thlengin hmuh theihna (chance) a neih laiin literature subjects English leh subject țhenkhatah mark hmuh san a harsa hle thung a ni.”
MPSC PAWHIN A MAMAWH?
Mizoram Public Service Commission (MPSC) in kum 2023 a Combined Civil Service Exam Mains result chu December 23, 2023 khan a ti chhuak a. Mains exam hma chhawn (exam pe ni loin) kim 292 ațangin Interview tura tling General category ah mipa 34, hmeichhia 26 = 60 bakah reserve category ah PwBD locomotor mi 5 leh PwBD blindness and low vision mi 5 te an awm .
Heng mite ațang hian hna ruak 33 hnawh khah tur a awm :
MCS 9 (Unserved)
1 (reserved for PwBD )
MPS 8 (unreserved)
MF & AS 9 (unreserved)
1 (reserved for PwBD)
MIS 4 (unreserved)
1 (reserved for PwBD)
OPTIONAL PAPERS
MPSC in Civil Services Combined Competitive Mains exam a buatsaih Unreserved 60 + reserved 10 = 70 zinga Optional papers -a subject vannei leh tling tam dan chu :
Mizo subject : Optional papers atan Mizo subject hmang mi 60 zinga 20 (33.3%) an tling.
Sociology:
Optional papers atan Sociology thlang mi 89 zinga 13 (14.6%) an tling.
Anthropology :
Optional papers atan Anthropology thlang tu 32 zinga 7 (21.8%) an tling.
Political Science :
Thlangtu 30 zinga 7 (23.3%) an tling.
Physics thlangtu awmin 1 tlingin 100% a ni a, Agriculture thlangtu 5 zinga 3 (60%) an tling, Philosophy thlangtu 2 zinga 1 a tling 50% a ni.
A hnuaia subject thlangtute hi tling an awm lo.
Geography
Economics
Zoology
Botany
English
Commerce and Accountancy
Education
Geology
ASSAM TIHDAN KAN MAMAWH?
Assam State pawhin harsatna an tawk rei tawh hle a, zirlai tam tak mangan au aw chu Assam Cabinet-in ngai pawimawhin Combined Competitive Exam APSC in a buatsaihah Optional papers a ti tawp ta a.
A chunga MPSC in Civil Service Combined Competitive Exam a buatsaihah hian Optional papers hi Assam tih dan anga tihtawp ni se, candidate țha zawk kan hmu ang em tih te, he hna a luh tum tan kawng zau zawka hawn a ni ang em tih hi uluk taka ngaihtuah ngai a ni.
SourceTHE NE NEWS NOW
December 7, 2022
MPSC Notification 23/11/23