- Ruata
South Korea company lar Kia chuan an sub-compact SUV lar Sonet chu hmel thar nen thla thar December thlaah hian an tlangzarh hman beisei a ni.
Kia Motors hian India ram SUV market lamah Kia Sonet hmel thar hmang hian nasa thawm rawn neih tumin hma an la mek a. Hyundai nena unau company anga sawi thin Kia hi India ramah pawh an rawn che tha chho viau a, tunah hian hmasawn tumin hma an la zui zel bawk a ni.
Kia Sonet thar tur hi an enchhin lai te pawh hmuh tur a awm ta neuh neuh a. December thlaa a rawn chhuah tur hi thu thang leh media hrang hrangin an report dan a nih laiin company lam chuan official in an la puangzar lem lo a. A tlangzarh ni tur tak te pawh company lam ngaihchan a la ngai dawn a ni.
Mizoramah pawh SUV lei hlawh leh lar ber te zinga mi ni mek Sonet hi a thar lo chhuak turah hian kawng hrang hrangin an rawn thawm that belh beisei a ni a. Sub 4 meter SUV huanga a elpui dangte hi Tata Nexon, Maruti Suzuki Brezza, Hyundai Venue leh Mahindra XUV300 te ho an ni a. An vai mai hian tunhnaia India rama lirthei hralh kal ber ber an ni vek mai a. A dingchang bik nih pawh thil har tak tur a ni a, hetihrual hian Tata Nexon hi hralh tam ber te zinga mi a ni a, a dang pawh hi an hralh tam hlawm vek tho a ni.
- Kia Sonet hmel thar?
A chhung lamah chuan danglamna lian tham a awm em em loh hmel a, hetihrual hian a instrument cluster hi an khawih danglam hret hmel a. Heng bakah hian a chhung design hrang hrang leh a siamna hmanruaah te danglamna a awm hmel a. A hmaa mi nena khaikhinin he lirthei chhung bawr hi a lang itawm zual viau dawn a. A hmaa a kentel hrang hrang ventilated front seat, air purifier, UVO connected car technology, 7-speaker Bose audio system, voice commands, keyless entry and go, cruise control, tyre pressure monitoring system, Isofix child seat mount leh thildang dang chu a la awm zui zel hmel bawk a ni. .
A pawn lamah hian Kia Sonet hian hmel thar a nei ang a, danglamna tlem tlem a awm dawn a. A hma bumper design thar leh headlamp assembly thar a nei dawn a. LED DRL thar te pawh kan hmu dawn a ni. Faux skid plate khawih danglam bakah fog lamp khawih danglam hret a nei ang a, han en mai pawhin rilru thar nen he Sonet hmel thar hi leituten an lei thei ngei dawn a, a landanah hian uchuak ni si loin tuna chhuak mek aiin a danglam hret dawn a ni.
A lirthei pang lamah pawh danglamna liantham a awm dawn lo na a alloy wheel thar a rawn neih hmel a. A hmaa wraparound taillamp khavertical taillamp in a rawn thlak hmel a, a hnung bumper hi an rawn ti sports design zual hret dawn a, dual-tone black & silver finish kan hmu dawn a ni.
A khawl lamah chuan 2024 Kia Sonet facelift-ah hian a hmaa mi ang 83bhp power pechhuak thei 1.2L naturally aspirated petrol, 120bhp pechhuak thei 1.0L turbo petrol, leh 100bhp power pechhuak thei 1.5L turbo diesel engine te duhthlan tur a awm leh ang a. Transmission lamah pawh 5-speed manual, 6-speed iMT, 7-speed DCT, leh 6-speed torque converter automatic unit te duhthlan tur a awm hmel bawk a ni. He lirthei thar chanchin hi kimchang leh chiang lehzualin company lam atang pawhin kan hre thuai turah beisei ang.