India chuan a thenawm ramria awm, Myanmar chu ramri hnaihte tihchangkanna atan $ mtd 5 a hlan leh ta a, tangkai taka hman a nih beisei a ni.
Myanmar rama India palai, Vikram Misri chuan $ mtd 5 lak chhuah theihna cheque chu Thawhtanni khan Myanmar ram minister for border affairs, Lt. General Ye Aung hnenah a hlan a ni.
Kum 2012-a Border Region Development tia inremna an siam angin India sorkar hian kum nga chhungin India-Myanmar ramri tihchangtlunna atan $ mtd 5 zelin a pui mek a, hemi thu kal zel hi a ni.
India leh Myanmar ramten May, 2012-a ramri hnaihte tihchangkanna atana inremna, Memorandum of Understanding an ziahah chuan India hian $ mtd 25 zet Myanmar hi a pe dawn a, hei hi kum 5 chhungin $ mtd 5 zela pek tur a ni.
A kum khatnaa pawisa hmanga thawh tur zingah hian Myanmar ram chhunga Chin State leh Naga Self Administered Zone-ah sikul 21 din, health centre 17 din leh lei 8 dawh te a tel a. A kum hnihnaah hian Myanmar sorkar chuan helai bawrah tho hian kawngpui lian panga a sial dawn a, contractor pawh a thlang fel tawh a. Chin State-ah sikul 3 leh Naga Self-Administered Zone-ah sikul 8 din a ni bawk ang.
India leh Myanmar ram hian ramri km 1,600 zeta thui an intawm a. Hengte hi India hmarchhak chhunga mi ek niin Manipur, Nagaland, Arunachal Pradesh leh Mizoram te nen an intawm hlawm a ni.