Borussia Dortmund in UEFA Champions League round of 16 a an hmun tichiang turin hnehna an chang a, AC Milan lakah goal thum khungin 3-1 in an chak.
Thawhlehni zana San Siro a inkhel hmuhnawmah German club hian mikhual ni chungin goal hmaah an hriamna an lantr a. Hetihlai hian Milan hi tlawm mahse round of 16 beiseina an la nei ve thova, mahse midang result-ah an innghat tel tawh.
Milan khawpuiah Dortmund goalkeeper Gregor Kobel chuan an si phur hmasa tur dangin Olivier Giroud penalty pet chu minute 6-naah a dansak a. Hemi hnu minute li ah hian Dortmund in penalty hmu ve thungin Marco Reus chuan goal-ah a khung.
Samuel Chukwueze chuan Milan tan first half-ah goal tha bik khungin an si phurh a sut a. July thla a Villarreal atanga San Siro a pan hnua a goal khung hmasak ber a ni.
Second half-ah erawh Dortmund in an penalty hlawhchhuaktu kum 19 mi Jamie Bynoe-Gittens hmanga goal khungin huntawp hma in substitute Karim Adeyemi chuan an goal hnuhnung ber a khung ve leh a ni.
- Group F a la inhawng
Inkhel lehlamah Paris Saint-Germain in Newcastle United laka point hmu turin vanneihna an lama a tan an mamawh a. Penalty sawihlawh tak huntawp dawnah hmu in 1-1 in an inhnehtawk.
Parc des Princes-ah Newcastle United ruahmanna a fuh a, PSG chu hun rei tak chhung an chelh a. Minute 24-naah Alexander Isak chuan Magpies tan goal a khung.
PSG hian goal haluhawm engemaw zat nei mahse an khung thei lo thin a, Newcastle goalkeeper Nick Pope a fakawm hle bawk.
Second half tawp dawn hun pek belhah ball in Tino Livramento awm leh ban a fuh chu PSG in handball beisei in an au a, referee Szymon Marciniak chuan pitchside monitor-ah endikin penalty a phar zui. Kylian Mbappe-a’n an si phurh sutna turin a pet goal.
Group F-ah hi thla thar a round hnuhnung ber khelh a nih hunah chinfel a ni ang.
- Barca an tling e
Spanish champion Barcelona in goal chhuah hmasa zawk mahse knockout rounds khel turin an tling a, 2-1 in FC Porto an lehthal.
Estadi Olímpic Lluís Companys-ah Porto tan Pepe chuan minute 30-naah goal a khung a. Mahse hei hi Joao Cancelo chuan Barcelona tan first half-ah a sut a. Second half-ah Joao Felix nena inkawpin Porto tlarhnung thiatin Felix hian an chakna goal a khung leh bawk.
Barcelona hian kum hnih chhung Champions League group stage an pelh zawh loh hnuah a vawikhatna atan round of 16 nakkumah an khel leh dawn tihna a ni.