Aizawl: National Health Mission (NHM) Mission Director Dr Eric Zomawia’n kumin December thla chhung zawnga kalpui tur, Mizorama blood bank hrang hrangah ‘Krismas pual thisen pek’ a hawng.
Civil Hospital, Aizawl Blood Bank-a hawnna inkhawm neihah Dr Eric Zomawia’n AVBD leh an thawhpuiten Krismas puala thisen pek an huaihawt thin chu damlo, thisen mamawhte tan a hlu tak zet tih sawiin, thisen hmanga mihringte chhandamtu Isua piang lawm nan leh mi dangte nunna chhan nan thisen pe turin Mizo thalaite a sawm.
Inkhawm kaihruaitu, Association for Voluntary Blood Donation President C Lalnunnema pawhin Mizorama hunpui lai, Krismas leh kum thar vuakvetah pawl hrang hrangte an buai a, kum tharah pawl insiam rem lai a nih bawk avangin pawl hminga thisen pe pawh an tlem thin thu a sawi a, “Hengte avang hian kum 2010 atang khan Krismas puala thisen pek hi buatsaih thin a ni,” a ti.
Krismas puala thisen pek hi AVBD, MSACS, NHM leh blood bank hrang hrangte huaihawt a ni a, hawnna inkhawmah hian Civil Hospital, Aizawl (CHA) Medical Superintendent Dr Zoramthanga, AVBD hruaitute leh CHA blood bank-a thawkte an tel.
December, 2023 chhung zawng Krismas puala thisen pek hi kalpui a ni dawn a, blood bank-ah kalin thisen pek theih a ni a, thisen petute hnenah ei tur tuihnai tak leh thilpek pek zel a ni ang.
Nimina a hawn ni-ah Mamawii Higher Secondary School NSS-ten thisen unit 18 an pe nghal a, petute hmeichhia vek an ni.
AIZAWLA KRISMAS PUALA THISEN PEK
No. Blood Bank 2019 2020 2021 2022
- Civil, Aizawl 690 1,108 1,378 1,661
- Synod Hospital 338 179 317 267
- ZMC 64 26 128 N.A