Indian Air Force thlawhna, Antonov An-32 chu nimina Assam-a Jorhat atanga a thlawk chhuak chu a hnu lawkah a chin hriat lohvin a bo va, zawn mek a ni.
Thlawhna hi mihring leh bungraw thiar kual nana hman thin a ni a, nimin chhun dar 12:25 khan thlawk chhuakin thawktu (crew) 8 leh passenger 5 an chuang a, Mechuka, Arunachal Pradesh-a tum tur a ni.
Lei lam atanga biakpawh theih hnuhnung ber chu chhun dar 1:00 a ni a. A hnuah a chin hi hriat zui a nih tak loh avangin zawn hna thawk mek a ni.
Thlawhna thlawhna lai bawr vel hi a tlangram chhengchhe hle a, a ngaw tha hle bawk a. Mechuka-a tum leh thlawh chhuah pawh hi thil hautak tak a ni.
An-32 hi Russia siam niin engine pahnih hmang, turboprop transport aircraft a ni a, Indian Air Force hian kum 40 chuang an lo hman tawh a ni.
Kum 2016 khan Indian Air Force ta tho, An-32 hi Chennai atanga Andaman & Nicobar Islands pan tur chu Bay of Bengal tuipui chungah a bo tawh bawk.
Hemi tuma thlawhna zawn hna hi India rama thlawhna bo zawn tawh zawng zawnga beih nasat ber a ni a; mahse, hmuh chhuah a ni ta chuang lo va, a chuang mi 29 chu an thi vek nia ngaih a ni.