Mizoram State Assembly inthlanpui 2023 atana vote chhiar tura inbuatsaihna hrang hrangte tluang taka peih fel a nih hnuah vawiin zing dar 8 atangin district hrang hrangah chhiar tan a ni ang.

Vote chhiar hi zing dar 8 atangin postal ballot chhiara bul tan a ni ang a, zing dar 8:30 atangin EVM (control unit)-a vote tlate chhiar zui nghal a ni ang.

Vote chhiar lai hi candidate, election agent leh counting agent-ten a hmunah an en thei ang.

EVM-a vote tla chhiar zawh vek hnuah assembly constituency tina polling station pangaa VVPAT-a vote tla (paper slip)-te chu EVM-a vote tla nen a inmil em tih finfiah zel a ni dawn a. VVPAT chhiar turte hi pawhfuh hmanga thlan tur a ni.

VVPAT-a vote tla chhiar (mandatory verification) hi inthlanpui hmasaah khan assembly constituency tuna VVPAT pakhat zelah neih a ni a, kumin inthlanpuiah hian bial tinah VVPAT panga zel chhiar tel tawh tur a nih dawn avang leh heng VVPAT-te hi a ruala chhiar lova a indawta chhiar tur a nih avangin vote chhiar hun chhung pawh a rei phah hret thei dawn a ni.

Vote chhiarnaah hian Returning Officer, Assistant Returning Officer, Counting Supervisor, Counting Assistant, Micro-Observer leh hna pawimawh dang hrang hrang thawktu mi 2,780 vel an awm dawn a. Polling station tina Presiding Officer 1,276-te chu vote chhiar ni hian an awm bawk ang.

Venhimna lama thawktuten counting centre tinah thuah thumin venhim hna an thawk dawn bawk.

Mizoram inthlanpui 2023-ah hian counting centre 13-ah assembly constituency tin tan counting hall pakhat zel awmin, a vaiin counting hall 40 a awm dawn a. Heng counting hall-ah hian counting table 396 awmin vote chhiarna dawhkan tinah hian counting supervisor pakhat, counting assistant pakhat leh micro-observer pakhat zel an awm dawn a, vote chhiarna hmun hi ECI ruat observer 40-ten assembly constituency tinah a malin an vil dawn a ni.

Hmunhma awm dan azirin counting hall-ah counting table-te hi dah a ni dawn a. Counting table awm zat leh vote chhiar tur polling station awm zat hi chhiar hun (round) pawh hi a hril dawn a. Round ngaa chhiar zawh tur assembly constituency pasarih a awm a, round li awmna bial 12 awmin, round thum awmna bial 18 leh round hniha chhiar zawh tur bial pathum a awm bawk.

Mizoram State Assembly inthlanpui hi November 7, 2023 khan boruak muanawm tak hnuaiah hlawhtling taka vote thlak niin zan dar 11:50-ah zawh fel hman a ni. Vote thlak that ngaihna awm chhun chu Muallungthu Polling Station niin November 10, 2023 khan vote thlak that a ni.

Mizoram puma EVM hmanga vote tla zat chu zaa 80.66 a ni a. Heng bakah hian postal ballot hmanga vote thlak (home voting, facilitation centre voting leh service voting) te awm bawkin vote chhiar fel zawhah inthlanpuia vote tla zat dik tak, EVM leh postal ballot hmanga vote tla zat belhkhawm a hriat theih dawn a ni.

Kumin Mizoram assembly inthlanpui atan assembly constituency 40-ah candidate 174 an awm a, heng zinga 16 chu hmeichhia niin bial 18-ah an chuh a. Independent-a chuh mi 27 an awm bawk.

Political pathum – Zoram Peoples’s Movement (ZPM), Mizo National Front (MNF) leh Indian National Congress (INC) ten bial 40 awm zawng zawngah an chuh kim vek a. Bharatiya Janata Party (BJP)-in bial 23-ah chuhin Aam Aadmi party (AAP) chuan candidate pali neiin a vawi khat nan Mizoram state assembly inthlanpuiah an chuh ve a ni.

NGO Coordination Committee leh political party hrang hrang bakah, kohhranten Mizoram assembly inthlanpui neih kal zela vote chhiar hun sawn tura ECI-ah ngenna an thehluh hnuah vote chhiar hun tura ruat, December 3, 2023 (Pathianni) chu a tuk, December 4, 2023 (Thawhtanni)-ah sawn a nih thu, ECI chuan December 1, 2023 (Zirtawpni) khan hriattirna a tichhuak a. Vote chhiar ni thlak tih loh chu MLA inthlanpui 2023 kalpui kawnga ruahmaanna siam dangte erawh thlak a awm lo thung.

DISTRICT HRANG HRANGA VOTE CHHIARNA HMUN TURTE

District Counting Centre
Mamit DC Office Complex
Kolasib Govt Kolasib College
Aizawl Assembly Secretariat,
Annexe Building
DC Office Building
Govt Aizawl College
Assembly Secretariat,
Annexe Building
Saitual DC Office
Khawzawl DC Office
Champhai DC Office Complex
Serchhip DC Office Complex
Hnahthial DC Office
Lunglei Saikuti Hall
Lawngtlai Govt Lawngtlai College
Siaha Govt Saiha College