World AIDS Day pualin Kolasib-ah hun hmang

Mizoram State AIDS Control Society (MSACS) leh District AIDS Prevention & Control Committee (DAPCC), Kolasib District tang kawp huaihawtin Inrinni zingkar khan Kolasib Venglai Bazar bul, YMA Park-ah World AIDS Day 2023 pualin hun hman a ni.

He hun hmanpuitu Kolasib District Senior Chief Medical Officer Dr RK Lalthlamuana chuan, Kolasib District-a HIV (Human Immunodeficiency Virus) kaina tam ber chu mipat hmeichhiatna hman khawloh atangin leh ruihhlo ngaiten hriau thianghlim lo an inhman tawm atangin a nih thu a sawi a. Mihringin harsatna leh beihna an tawhna tam ber chu ram hla taka mite atang ni lovin, an bul hnaia mite atangin a ni thin tih sawiin, “HIV kan kai theihna sang ber pawh kan hriat chiante leh kan bul hnaia mite atangin a nih avangin kan fimkhur a tul a ni.” a ti.

Dr RK Lalthlamuana chuan, taksaa HIV hrik inthlah pung tur leh mi dang kai chhawng tur venna leh AIDS veina laka chhan thei, Anti-Retroviral Therapy (ART) chu a thlawnin District Hospital-ah lak theih a nih thu sawiin, HIV positive-te chu beidawng mai lo va, tha taka ART la ngei turin a chah.

Kolasib-a World AIDS Day hmannaah hian School of Nursing Thingdawl (SONT), Kolasib-a GNM zirlaite chuan HIV laka him nana inven fimkhur pawimawhzia lantirna leh a veite hmusit leh thinhrik lo va, hmangaihna nena enkawl zawk tura inchahna lemchan tawi an entir a ni.

Kolasib District CMO office data atanga a lan danin, April 2023 atanga October 2023 chhungin Kolasib District-ah HIV an kai leh kai loh finfiah nana thisen test (general) 3,435 atangin HIV positive hmuh chhuah 75 an awm a; raipuar thisen test (ANC) 1,195 atangin HIV positive hmuh chhuah 11 an awm bawk a; a pum puiah HIV positive 86 hmuh chhuah an ni.

Kolasib District-ah hian ART awm tirh atangin PLHIV (People Living with HIV/AIDS) inziak lut 1,630 awm tawhin, mi 298 chuan vanduaithlak takin nunna an chan tawh a. October 2023 report-a PLHIV in-register 1,255 zinga mi 1,245 chuan damdawi ART an ei mek a ni.

Kolasib District chhunga damdawia inchiu thin – IDU (injecting drug user) chhinchhiah 1,293 zingah HIV kai 387 awmin, hmeichhe inzuar – FSW (female sex worker) chhinchhiah 153 zingah HIV kai 16 an awm a; mipa leh mipa inpawlna hmang thin – MSM (men who have sex with men) chhinchhiah 25 zinga 5 chu HIV positive an ni bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427