Mipa naupang kum 7 mi chauh a la ni a, tunlaia video inhlanchhawn (share)-na lian leh lar, YouTube-ah account a nei a, a inawmlemna (toy) neihte chu an chungchang a sawina video a dah thin a, kum khat chhungin heng video avang hian $ mtd 22 (£ mtd 17.3) zet a hai lut a, YouTube atanga kum khat liam ta chhunga sum la lut tam ber a ni der mai.
Forbes magazine chuan he mipa naupang, Ryan leh YouTube-a a channel, Ryan ToysReview hian nikum lama sum la lut tam ber nihna lo hauh tawh, Jake Paul chu $500,000-a khumin nikum July leh kumin June inkara sum la lut tam berah a puang a. Anni pahnih hnuaiah hian Dude Perfect channel chu awmin $ mtd 20 a hlawh chhuak ve phak bawk.
Ryan hian a agent leh a lawyer te hnena chhiah leh thil dang hrang hrang a pek tel lovin nimina a hlawh chhuah let a hlawh phak a. NBC-in naupang dangten a video an ngainat chhan an zawh chuan, “Mi ka tihlim thiam a, fiamthu ka thiam bawk,” a ti.
Ryan hi a nu leh paten March 2015 khan channel hi an siamsak a, tun thleng hian thlirtu tld 26 vel a nei tawh a, zuitu (follower) pawh mtd 17.3 a nei tling tawh bawk.
Forbes-in an chhutnaah chuan a hlawh chhuah zinga $ mtd 1 hi a video intan dawna fakna lo lang thin hi a ni a, a bak dang zawng hi chu sponsor atangin a ni thung.
Sponsor post atanga sum a lak luh hi YouTuber (YouTube hmangtu) dangte aiin a tlem zawk niin an sawi a, a nu leh pa leh amah hian an lo duh viau pawhin lan têttir an duh avangin a to/tam thei lo thin lo a ni.
Ryan hi amahin sum a lak luh bakah hian a inawmlemna a sawisak (review) thin siamtute pawhin an hlawkpui thin hle a, hetianga a video-a toy a lantir tawhte hi chu an hralh kal nghal viau zel a ni.
August thla atang khan bazar lian, Walmart pawhin Ryan’s World tia hming vuahin inawmlemna leh thawmhnaw lam a zawrhna a siam hial a. Ryan-a leh a nu leh paten Walmart dawra a inawmlemna tur an zawnna video pawh thla thum chhungin thlirtu mtd 14 zet an tling hman a ni.
Heta tang hian Walmart pawh an inhralh tha sawt a, nakumah hi chuan Ryan-a sum lak luh zat hi an lak luh phak an inbeisei mek.
Tunah naupang mai a la ni rih a, a sum hi ama pual a la ni thei lo va; mahse, puitling a nih hnuah a la dawng dawn a, tunah hian 15% chauh a bank account-ah a la lut rih.
Ryan-a te chhungkua hian YouTube hi an hmang tangkai ve hrim hrim a, a farnute pahnih (phir) pawh a video-a an lan nual bakah YouTube channel dang, Ryan’s Family Review an nei bawk a. An unau thuma an lanna, ‘Top 10 Science Experiments you can do at home for kids’ tih pawhin thlirtu mtd 26 chuang zet a nei.