French champion Paris Saint-Germain in an goalkeeper Gianluigi Donnarumma chu inkhel tan tir lamah red card a hmuh avangin tlem zawkin khel mahse 2-0 in Le Havre lakah hnehna an chang tho.
Pathianni zana Stade Océane a inkhelah Donnarumma hian penalty area pawnah Josue Casimir ball um chu va nan khalh tumin a tlan chhuak a, a ball pet chhuah tum tisualin Casimir hi a lu ah a pet fuh a, hei vang hian red card pek a ni.
Hemi hma lawk hian inhliam avangin Fabian Ruiz an thlak a ngai tawh a, goalkeeper Arnau Tenas dah luh a nih nan forward Bradley Barcola lak chhuah a ni.
Mahse Luis Enrique pawlten first half minute 23-naah Kylian Mbappe hmangin goal an khung ta thova. An goalkeeper Tenas chu che tha hle bawkin save tha a siam nual a. Huntawp dawn lamah minute 89-naah midfielder Vitinha chuan an goal hnihna a khung ve leh a ni.