Sawrkar thar kan hmu dawn a. Eng sawrkar nge kan neih dawn kan hre lo. Tupawh sawrkar sela mizoram harsatna leh dinhmun hnawk tak hi an hre vek a. Kan harsatna dik takah te hian hma an la ngam tawh turah ngai ila.
Harsatna tam tak leh hma kan sawn theih miah lohna lai bul pakhat chu kan education tha lo hi ani kan ti vek a. Kan education kalphung fuh lo siamtha ngam sawrkar hi mipui chuan kan awt ani ber mai. Mi tam tak sawi tawh thin angin ziak leh chhiar thiam percentage a sang fu si thiamna tak tak nei siloah kan thalaite kan chhuah nasa lutuk a. Chu chuan kan ram hmasawnna tak tak tur hi a dal ani an ti a. He thil hi kan sawrkar thar tur hian vei berah neih a, pawimawh bera an dah a ngai a ni.
Naupang kaihruai a, thiamna tak tak pe tur chuan zirtirtu an pawimawh ber lo thei lo. Chuvangin zirtirtute rilru hi en nawn a ngai a. Kan zirtirtute hian naupang hi thiamna tak tak nei turin an vei tur a ni. Hlawh hmuh nan ringawta hna an thawh chuan thiamna tak tak an thlenpui ngai lovang. Chuvangin zirtirtute rilru hi a hmasa bera siamthat ngai lai chu a ni. Kan zirtirtute hi a tam ber chu training fel taka zo vek an ni a. An thiamna hi iaiawm tur a ni lo. Anmahni hi ram leh hnam innghahna tak tak lai chu an ni tihah hian chiang em em sela, thahnemngaia an zirtir chuan kan nuapangte hi an kan mai a rinawm.
Zirtirtute khawpuiah an tam lutuk, thingtlang lamah an indaih lo tih pawh hi a dik rualin khawpuia sawrkar school zirna chu a tha bik em em chuang lova. Sawn rual hi chu an ngai teh meuh mai. Mahse, a hmasa zawkah chuan sawnrual dawn pawhin an rilru a pawimawh hmasa tho. Ram siamtu tur chu keimah ka ni tih an put hmasak a, thahnem an ngaih phawt chuan thingtlang khaw kil berah pawh an awm hreh lovang. Khawi hmunah pawh an hna ber zirtirna chu thawh tur thawh sen loh a awm si a. Khawi hmunah pawh awm se thahnemngai tak tak chuan aikal a lak phal a rinawm loh a. Ama hnaah khan a kal ngei a rinawm a ni. Chuvangin kan zirtirtute hi ram hmangaihna lama kan tui tir hmasak a, an tih tur dik tak zirtir hna chu tui taka an thawh dan tur hi education siamthat nan hna hmasaah i neih ang u.