Aizawl: ZPM President Lalliansawta’n Mizoram state assembly inthlanpui neih zawh taka hnenah an chang chu an phu reng vang ni lovin Pathian remruatah an ngaih thu a sawi.
ZPM chuan an party pisa-ah vote chhiar zawh a nih khan Pathian hnena lawmthu inkhawm an buatsaih a. He huna thusawitu ZPM President Lalliansawta chuan, “ZPM party-in hnehna ropui tak mai kan chang hi kan lawm takzet a, Pathian leh ram mipuite chungah lawmthu kan sawi tak meuh meuh a ni. Kum ruk chauha upa party kan ni a, kum sawmruk a upate pawh kan leh pel thei hi a ropui hle a ni,” a ti.
MLA inthlanpuia hnehna an chang chu an phu reng vang a ni lovin, Pathian remruatah an ngai tih sawiin Lalliansawta chuan, “Bible-ah chuan roreltu hi Pathian ruat an ni tih kan hmu a, hun a tihah roreltu chu a siam mai a ni. MLA-a tling zawng zawngte duhsakna sang ber kan hlan a, tling zo ve ta lote pawh an kal zelna turah duhsakna kan hlan a, kan ram tan theihtawp chhuah tlang turin kan in sawm a ni,” a ti.
Lawmthu sawina inkhawm hi Dr. Kenneth Chawngliana’n a kaihruai a, MLA tling tharte leh party hruaitu thahnem tak kalkhawmten lawmthusawina tawngtai rual hun an hmang a ni.