Indopui II-na hun lai daih tawha US Air Force indo thlawhna tla chu Roing district, Arunachal Pradesh-a hmun kilkhawr takah sipai patrol-ten an hmuchhuak nawlh mai.
Sipai 12, patrol-te zingah hian police aiawha tel ve pakhat a tel a, November 30 khan feet 10,000 zeta sang, Sindhi Hill an tihah thlawhna hi an hmu chhuak a. “Kea ram fang thin (trekker)-ten Lower Dibang district-a police hnenah thlawhna chungchang hi an hrilh hmasa a. Special Army patrol hi kal nghalin Roing atanga km 30 vela hlaah an han hmu ta a. A hmun thleng tur hian ni 8 lai an kal a, vur a chhah a, thing a tam bawk si avangin hmuh mai thei loh a ni,” tiin officer-in a sawi.
Indopui II-naah tangrual, Allied Powers thlawhna, US thlawhna pawh telin a bo nasa em em a. Hetih hun lai hian Assam/West Bengal atangin Kunming, China panin, Himalayas khawchhak lam hrutin an thlawk nasa a ni.
Tun tum chauh lo pawh hi Indopui II-na (1939-1945) hun laia thlawhna tla hi Arunachal Pradesh-ah hian hmuh a lo ni fo tawh thin.
Nikum July pawh khan USAF B-24 bomber leh C-109 thlawhna hlui bakah sipaite bungrua hrang hrang pawh hmuh a lo ni tawh a. Heng thilte hi US lamah lak a ni nghe nghe.
June, 2016 pawh khan hetih hun laia US president Barack Obama chuan Prime Minister Narendra Modi hnenah Arunachal Pradesh-a American Defense POW/MIA Accounting Agency (DPAA) mission-ah a puih that avangin lawm thu a sawi tawh a. He mission hi UPA sorkar lai khan China atanga dona a awm avangin tihtawp a ni.
American World War-II record-ah chuan tun thleng hian thlawhna 500 chuang leh thawktu 1,200 vel an la bo va. Heng sipai leh an thlawhnate hi kum 1940 vela Japan sipai do leta China-Burma-India vela chetlate an ni.