Meghalaya-a West Jaintia Hills police-te chuan hralh tur ni ngeia an rin tleirawl rual, kum 14 leh 16 inkar, West Jaintia Hills district-a Jowai khuaa veng hrang hranga mi chu an chhan chhuak.
Police-te hian heng mite hralh tumtu ni ngeia an ngaih mi 8 an man tel bawk a. An mi mante hi mipa 7 leh hmeichhia, kum 18-a upa an ni.
West Jaiñtia Hills SP Lakador Syiem chuan heng tleirawl an chhanchhuahte hi 9 niin an zinga 5 chu Mihmyntdu-ah Thawhtanni khan an chhanchhuak a, mi dang 4 hi Jowai khuaa hmun hrang hrang atangin an chhanchhuah bawk tih a sawi.
Syiem hian an mi mante hi hmeichh naupang hralh tur zawnga man to taka mi dang hnena hlan chhawng thin an nih thu a sawi a, thenkhat hi chu a lei tawhtute an ni bawk tih a sawi bawk.
SP chuan tleirawlte hi woman police-a Officer Incharge, Sub Inspector I.Kharpran-i kaihhruaina hnuaiah, Special Juvenile Unit, Child Line, Child Welfare Committee, District Social Welfare Officer leh ANTF tanghote chuan an chhanchhuak tih a sawi bawk.
An mi mante hi court-ah an hruai tawh a, thu zawh fiah zui atan an kawl dawn tih SP hian a sawi bawk.
Hmarchhakah tun hnai hian mihring hralh tur man chhuah a awm zeuh zeuh a ni.